Haloo midoobo talada qaranka

Maanta arrimaha nabedgelyado dalku waxay marayaan meel adag. In arrimahaa laga midoobo meel leyska wada taago waa waajib qaran. Weliba waxaan shacab-weynaha ku leeyahay waa in gacan la siiyaa booliiska shaqeynaaya. Ciidamada amniguna waa iney heystaan macluumaad ku filan oo ay si fiican u shaqeeyaan sirdoonka dalka oo ay ku jihoobaan dhinaca cadawga dalka ayney sirdoonka loo tusin in cadawga kowaad ee dalku yahay xisbiyada qaranka.
Khudbaddii dhaweyd ee madaxweynaha waxaa la filaayey in uu umadda u jeediyo khudbad ku jiheysan amniga iyo khilaafaadka qaranka. Inta badan madaxweynuhu warbixintiisu waxay aheyd mid difaac ah oo qodobkuu soo qaadaaba ay tahay naftii difaac. Ciduu iska difaacayayna waa axsaabta qaranka. Waxay aheyd, ilayn waa madaxweynihii qarakee, inuu ka hadlo wax ummada mideeya, xaaladaha adage ee dalku ku jirna u mideeya. Weli waxaa ka maqan aanu garan in uu madaxwene u yahay siilaanyo iyo feysal cali waraabe.
Mudane madaxweyne, annagu haddaanu mucaaridka nahay meelkasta oo aanu joogno debed iyo gudo waxaanu ka shaqeynaa midnimida ummadda, aqoonsiga Somaliland, walaaleynta shacbka iyo horumarinta dalka. Waxaase dhab ah in aanu ummadda mid guda jooga iyo mid debed joogaba aanu u sheegno,ugana warano in maamulkanu uu dayacay dalkii iyo dadkiiba, loonana baahanyahey isbeddel dhab ah . Dadkuna dayaca maamulkan waa ogyahey. Isbeddelna iyagaa dadku u diyaara ee ha ogaadeen.
Wuxuu maalintii dhaweyd madaxweynuhu yidhi waxaa nala yidhaa wixii xunba Xaawa leh. Haddi sidaas aad u markhaati furtey haddii aad wax wanaagsan qaban laheyeen waxey noqon laheydeen wixii wanaagsan Xaawa leh. Wuxuu aad u difaacaayey dayacii doorashadu dib ugu dhacdey oo ay masuul ka ahaayeen . khilaafka guurtida oo madaweynu kaw ka yahay, dhulka iyo gasiiradaha la iibiyey oo sharci darada ah,siyaasadooda liidata ee arrimaha debeda, arrimaha nabargelyo xumo ee ka soo korodhay bareha. Wuxuu madaxweynuhu arrimahaas iyo qaar kale oo uu soo qaatey ayuu ku tilmaamey in ay mucaaridkuu nagu canaanayaan haddey laba digaagood suuqa isku qabsadaan . Madaxweyne arrimaha aanu ka waaweyn laba digaagood oo isdiley ee waa arrimihii ugu cuslaa qarankan aad madaxweynaha ka tahay.Waxaasoo dhanna ama ka galgalo amma ha ka galgalane masuuliyaddeeda adiga leh. Waana sababta dalkanu ugu baahanyahay isbeddelkas si arrimahaas aad dayacdey loo badbaadiyo ilaahay ayaa wax badbaadiya.
Dr.Cabdi Aw Daahir Cal
xoghayaha bulshada kulmiye

wefdi safaaradda ingiriiska oo u socday arrimaha doorashooyinka oo la kulma madaxweyne rayaale

Madaxweyne Rayaale oo Maanta Qasriga Madaxtooyada Ku Qaabilay Wefdi Ka Socda Safaarada UK ku leedahay Ethiopia


Hargeysa (Golis News)- Madaxwayne Rayaale oo Saaka Qasriga Madaxtooyada Ku Qaabilay Wefdi Ka Socda Safaarada UK ku leedahay Ethiopia Warsaxaafadeed uu soo saaray afhayeenka Madaxtooyada Siciid Cadaani Mooge, ayaa waxa uu u qornaa sida tan

“Madaxweynaha Jamhuuriyadda Somaliland, Mudane Daahir Rayaale Kaahin, waxa uu saaka Qasriga Madaxtooyada ku qaabilay Wafti ka socda Safaaradda Dawlada Britten ay ku leedahay Dalka Ethopia. Waftigaas oo booqasho gaaban ku yimi Somaliland waxa hogaaminayay Safiir ku Xigeenka Safaarada Britten ee Dalka Ethopia Mr. John Marshal.


Waftigaasi oo ujeeddada socdaalkoodu u ahaa sii xoojinta xidhiidhka labada dal iyo in ay u kuur-galaan Marxaladaha Siyaasada iyo aminga Somaliland, gaar ahaan halka ilaahada ay Marayso u diyaar garawga Doorashooyinka Dalka ku soo fool leh.


Madaxweynaha oo hadal kooban Waftigaasi u jeediyay waxa uu Carabaabay in Somaliland Marwalba intii tamarteeda ah ay si taxadir leh u ilaashanayso nabadeeda iyo Xasiloonideeda iyadoo aynu ka war qabno amaan-darida iyo khataraha Mandaqada Geeska ka taagan.
Madaxweynuhu isagoo arintaas sii faah-faahinaaya waxa uu yidhi(Waxaan Codsanaynaa in Wadamada Caalamku oo Britten ka mid tahay in ay naga caawiyaan sidii marwalba aan u sugi lahayn Arimaha nabadgelyada iyo amnigaSomaliland ay ku Caano maashay)


waxa kale oo Madaxweynuhu soo qaaday in wax allaale wixii khilaaf Siyaasi ah ay Somaliland dhexdeeda ku dhamaysandoonto sidii looga bartay, iyadoo Komishanka Cusub ee Doorashooyinkana Madaxweynuhu ku hanbalyeeyey sida fiican ee hawshoodu u wadaan iyadoo Xukumadiisuna ay marwalba diyaar u tahay in ay Dalka ka qabsoomaan Doorashooyin Xor ah oo Xalaal ah marka Komishanka Doorashooyinku wakhtigeeda Cayimaan.

Waftigaasi Safaaradda Britten waxa kale oo ka mid ahaa Mr. Matt Woods oo isaguna ah Madaxda sare ee Safaarada Britten ee Dalka Ethiopia .


Waftigu intii ay joogeen Somaliland waxa kulamo kala duwan ay la yeesheen Wasiirro dhawr ah oo ay ka mid yihiin Wasiirka Arrimaha Dibada Wasiirka Dib u Dajinta iyo Wasiirudawlaha Arrimaha Gudaha.


Waxa kale oo waftigu kulama iyana la yeesheey Komishanka Doorashooyinka iyo qaarka mid ah Axsaabta Qaranka”.


Nimco Muxumed Ibraahin


qaali540@hotmail.com

XISBIYADA MUCAARIDKA IYO SIYAASIYIINTA OO ARAGTIYO KALA DUWAN KA BIXIYEY SAFARKII MADAXWEYNE RAYAALE EE GOBOLKA TOGDHEER 20090609

XISBIYADA MUCAARIDKA IYO SIYAASIYIINTA OO ARAGTIYO KALA DUWAN KA BIXIYEY SAFARKII MADAXWEYNE RAYAALE EE GOBOLKA TOGDHEER
Posted on June 9, 2009

Xisbiyada Mucaaridka iyo xubno kale oo siyaasiyiin ah, ayaa aragtiyo kala duwan ka bixiyay Socdaalkii Madaxweyne Rayaale ku yimi gobolka Togdheer, kaasoo ay ku tilmaameen inuu ahaa olole siyaasadeed oo uu taageero ugu raadinayay xisbigiisa UDUB ee uu u sharaxan yahay.

Dr.Cabdi Aw-daahir oo ka mid masuuliyiinta sare ee Xisbiga Kulmiye oo Wariyaha Jamhuuriya ee Gobolada Bari Somaliland Kayse A.digaale wax ka waydiiyay sida uu arko safarkii madaxweynuhu ku yimi Gobolka Togdheer, ayaa waxa uu yidhi; “Marka hore dadweynaha gobolka Togdheer xisbi kastoo uu yahay wuu soo dhaweeyay madaxweynaha, laba arrimood awgood, waa ta kowaad oo wuxuu sitaa haybadii qaranka iyo ta labaad oo ah, gobolka Togdheer oo caado u leh soo dhaweynta Martida.

Markaan taa intaas ku dhaafo su’aasha meesha taalaa, waxa weeye muxuu xambaarsanaa safarka madaxweynuhu,? Waxay ahayd oo keliya olole siyaasadeed oo nuxurkiisu ahaa inuu ku difaaco oo keliya arrinkii yaalay ee ahaa inaanu Rayaale toddobadii sannadood ee uu talada hayay aanu mar keliya gobolka Togdheer soo booqan. Halkuu marxuumkii cigaal labadii sannadoodba mar iman jiray gobolka Togdheer laga bilaabo 1997 oo kala ahayd 1999kii iyo 2001dii.

Su’aasha labaad ee lays weydiinaayaa waxay ahayd farriintuu shacabka reer Togdheer iyo Somalilandba u siday maxay ahayd,? ma taabtay madaxweynuhu arrimihii yaalay ee bulshadu ka sugaysay.?

-Ma beddelay lacagtii giimbaarta ahayd ee Saddexda jeer miisaaniyada lagu soo daray ee aan ilaa maanta aanay ummadu garanayn waxay ku maqantahay,? Jawaabtu waa maya.

-Madaxweynuhu ma keenay xal kootada lagaga qaadaayo iibka xoolaheena ee loo lugaysiiyo Jabuuti, dekedii ugu weyneyd xoola dhoofinta geeska Afrika ee Berberana ay u haawanayso? Jawaabtu waa maya.

-Madaxweynu ma abaaray arrinka tahriibta dhallinteena xeebaha ku dhammaaday ee si caam ah dalka u saamaysay, si gaar ahna Togdheer u taabatay? Jawaabtu waa maya.

-Madaxweynuhu ma ka noqday arrin xumidii loogu sameeyay laba taliye qaybeed Burco looguna kala qaybiyay laba beelood. Jawaabtu waa maya.

- Madaxweynuhu ma ka hadlay shaqaalaha iyo ciidammada musharka yar iyo ciidammada toddobada sannadood ka sugaayay darajada in la siiyo? Jawaabtu waa maya.

Waa arrimahaas iyo kuwo kale oo badan kuwa maanta Somaliland iyo Togdheerba ay rabaan cid wax uga qabata. Waa kuwa Rayaale aanu hore wax uga qaban, imminkana aan laga sugayn in uu wax ka qabto. Waa kuwan iyo kuwo kaloo badan, kuwa uu balanqaadaayo Kulmiye in uu wax ka qabto markuu talada qabto insha Allaah, waa kuwa uu kaga duwanyahay UDUB iyo hogaankooda ee ay dadku nagu dooranayaan.

Waxa kale oo Dr.Cabdi Aw Daahir, intaas raaciyay, ‘Markaan intaa kaga tago nuxurka iyo farriinta uu xambaarsanaa socdaalka Rayaale, aan wax yar ka idhaahdo qaabka uu safarkiisu u dhacay. Waxay dadka reer Burco inta badan ku war helay madaxweynihii wuu joogaa. Muu soo dhaafin biriijka. marka loo eego safarradii Burco ee madaxweynihii hore ee geeriyooday ee marxuum Cigaal waxay dadku ku soo dhaweeyeen iyagoo safan laamiyada suuqyada magaalada dhexdeeda iyagoo caleemo qoyan lulaya. Markii dambena marxuumkaasu kolayba labo, saddex jeer suuqa wuu soo dhexmaray. Hadalka Madaxweyne Rayaale wuxuu ku koobnaa balamo ah waa is arkaynaa waa inoo Hargeysa.

Markaan soo uruririyo waxaan ku soo gebogabaynayaa Madaxweyne Dahir Rayaale kaahin oo toddobadii sannadood ee uu talada hayay aan iman Burco. Wuxuu awoodi kari waayay inuu shacabka reer Togdheer iyo ka reer Burco uu kheriyada kala hadlo, taasoo ka turjumaysaa laba arrimood oo kala ah in aanu taageero badan ku lahayn Togdheer iyo ta labaad oo ah in aanu hayn wixii uu kaga jawaabi lahaa arrimaha ummadu ka sugayso.

Sidoo kale Cismaan Af-Gaab oo ah gudoomiyaha Xisbiga UCID oo isaga Wariyaha Jamhuuriya wax ka waydiiyay socdaalkii Md.Rayaale iyo waftigiisu ku yimaadeen degaanka togdheer ayaa isagoo ka jawaabaya waxa uu yidhi ““Marka hore waxa safarka madaxweyne Rayaale ku yimi Gobolka Togdheer uu ahaa safar olole oo taageero loogu raadinayo xisbiga UDUB.

Waxa kale oo ku jirtay waji dhawrasho ka dib 7 sanno oo uu madaxweyne ahaa oo aanu marna soo eegin dadkii soo doortay, balamihii uu hore ugu qaadayna waxba ka fulin, marka la soo ururiyo waxaanu u aragnaa safarka madaxweynaha mid aan waxba ku soo kordhin Gobolka iyo dadka ku nool toona.

Waxa iyaduna meesha taal, in uu madaxweynuhu bilaabay olole doorasho, taasi oo ah mid sharciga ka soo horjeeda, maadaama aan la gaadhin xiligii ololaha doorashada, inuu safarka madaxweynaha waxba soo kordhin waxaa ka markhaatiya hadaladiisa ka soo horjeeda waxay dadku ka hadlayeen ama ka dalbadeen.

Cabdi farjar oo ka mid ah siyaasiyiinta Somaliland, iyo madaxdii ururkii SNM, ayaa isagana Wariyaha Jamhuuriya wax ka waydiiyay sida uu arko, socdaalka madaxweyne Rayaale ku yimi Gobolka Togdheer waxaa uu yidhi

“horta socdaal waliba waa kaambeyn, sawaxan iyo ogaysiis ka soo horeeyey ma jirin, wixii hore ee uu balan qaadayna lama sidin, mana jirin taageero si guud loo waydiistay bulshada, hase yeeshee waxaan u arkaa dhawr arrimood ay ka mid yihiin, inuu jiray qorshe xidhiidh hore oo siyaasad dawliya oo dad gaara oo mucayina lala lahaa, in wixii ka soo baxay la qiimeeyo si loogu dhiirado ama looga noqdo.

Ta kale soo dhaweyntiisan oo u muuqatay in lagu samaynayo badhamadii kaambayn siyaasadeed oo socda.

Waxa kale oo Cabdi Farjar intaas ku daray in madaxweynuhu beeniyey eedaymihii mucaaradku ku duri jireen, ee ahaa wuxuu kaambeynka ku galaa urursiga hantida qaranka, taasina kama muuqan socdaalkiisa, waayo “Qiimihii jaadka ee cirka isku shareeri jiray marka wafuuda dawlada iyo mucaaridku yimaadaan, ma kordhin ee hoos ayuu u sii dhacay qiimihiisii,”ayuu yidhi. Cabdi Farjar, isaga oo tilmaamay in safarkan madaxweynuhu ku soo beegmay xili abaareed oo aan roobabkii gu’gu si wanaagsan u di’in, sidaas darteed uu doonayo inuu kaga faa’iidaysto madaxweynuhu oo ku dhawaaqo in xaalad abaareed ka jirto dalka, si Doorasahada dib loogu dhigo, maadaama ay abaartu ka mid tahay aafooyinka qaranka ee sharcigu baneeyey.”

Sidoo Ibraahin Doodi oo mar ahaan jiray Taliyaha Sirdooka Qaranka Somaliland oo Wariyuhu wax ka waydiiyay aragtidiisa Safarka Madaweynaha ee Togdheer ayaa isaguna waxa uu yidhi “Waxa haboonayd in madaxweynhuhu sii kaxaysto qaar ka mid ah hay’addaha samafalka ee jooga, si uu tuso xaalada amaan ee ka jirta dalka, isagoo kaga faa’iidaysanaya socdaalkaasi, hadii taasi aanay dhici waxa bishan Juun ee aynu ku jirno waa xiliga qaramada midoobay qiimeeyaan xaalada ammaanka dalalka ay ka hawlgalaan, sidaas darteed waxa haboon in madaxweynuhu qoraal u diro UN-Ka oo ku baraarujiyo in ay dib uga noqdaan qiimayntii sannadkii hore ay sameeyeen ee ay ku tilmaameen in dalkeenu ka mid yahay kuwa ugu hooseeya amaankoodu.

Talabadanina waxay fududaynaysaa in hay’adda samafalku ka qaybqaataan gurmadka xaalada abaareed ee ka jirta gobolada dalka oo ay meelkasta tagi karaan.islamrkaana lagaga hortago kuwa cadowga u ah Somaliland.”



Jamhuuriya Online

Waxaanu Go’aansanay In aanu Taageeradayada Siino Xisbiga KULMIYE

Waxaanu Go’aansanay In aanu Taageeradayada Siino Xisbiga KULMIYE, Markaanu Egnay Danta Dalka”Mid ka Mid ah Beelaha Waaweyn ee G/Burco
May 6th, 2009 Comments Off

“Waxaanu Go’aansanay In aanu Taageeradayada Siino Xisbiga KULMIYE, Markaanu Egnay Danta Dalka”Mid ka Mid ah Beelaha Waaweyn ee G/Burco


“Dhabtii Libaaxu Maanta KULMIYE ayay ku soo Biirtay ee Tolo Maxay Odhan UDUB, beeshan aan arkona ma ogi meel ay dhogortii libaaxu kaga maqan tahay” Cabdi Xuseen Dheere

Burco (Somaliland.org)-”Xirsi Cismaan Xoogiisii Xuduuda ka Sokeeyay ee Somaliland Degenaa Caawu (Xalay) Xisbiga KULMIYE ku soo Biiray, waayo? Dee Beelaha Gaashaanbuurta Siciid Waqooyi waa reeraha ugu Badan ee Beesha Galbeedka Burco”

Sidaasi waxa yidhi Dr Cabdi Aw-Daahir Cali oo hadal soo dhaweyn ah ka jeediyay Xaflad uu Xisbiga KULMIYE ugu Qabtay Hoteelka Barwaaqo ee Magaalada Burco Taageerayaal Beeleed cusub oo ku soo biiray

Dr Cabdi Aw-Daahir waxa uu xusay in ay Xisbiga KULMIYE guul ku dhaweynayaan taageerayaashan Cusub ee ku Soo biiray,” ku Soo biiritaankiinu waxa uu KULMIYE ku dhawaynayaa in uu guul ka gaadho Doorashada Soo socota waxaanaanu idinku soo dhaweynaynaa Xisbigiina anigoo ku hadlaaya magaca Hogaanka Xisbiga KULMIYE iyo kan Fulintaba” Ayuu Yidhi Dr Cabdi Aw-Daahir

Xafladani oo ahayd mid si heersare ah loo soo agaasimay ayaa waxa ka hadlay Caaqil C/Laahi Muxumed oo ku hadlaayay Magaca Beelaha Gaashaanbuurta Siciid Waqooyi (Xirsi Cismaan H/Yoonis) kaasi oo sheegay in ay beeshiisu si rasmi ah ugu soo biirtay Xisbiga Mucaaradka ah ee KULMIYE

“Hadii aanu nahay Beelaha Gaashaanbuurta Siciid Waqooyi Iyo Reer Muumin Waxaanu awal hore taageeri jirnay Xisbiga UDUB, waxaanu cadaynaynaa in aanu uga diga-roganay Xisbiga KULMIYE oo aanu maanta wixii ka danbeeya la bar-bar istaagi doono taageero hiil iyo Hooba leh” Ayuu Yidhi Caaqil C/Laahi Muxumed

Sidoo Kale waxa Munaasibadaasi oo ay goobjoog ka ahaayeen masuuliyiinta Xisbiga KULMIYE ee gobolka Togdheer ka hadlay Axmed Xasan Reeme oo ka mid ah cuqaasha beelahaasi ” Waxaanu taageernay Doorashadii Madaxtooyada Xisbiga UDUB, Riyaalena Iskadaa waxa uu noo qabtee Maalin qudha muu iman Magaalada Burco malaa wuu ka baqayaaye, markaa waxaanu is nidhi KULMIYE ayaan Burco ka Baqayn oo xaaladeeda ka warhayn karee taageera” Ayaa ka mid ahaa Ereyadii Axmed Reeme


Mujaahid Ibraahin Cali Daray oo ka mid ahaa Taageerayaasha Cusub ee ku biiray Xisbiga KULMIYE ayaa isaguna Munaasibadaasi ka sheegay, in ku biiritaankoodu ku salaysan yahay Qadiyada dhab ah balse aanu ahayn wax iska Khiyaali ah

“Beeshayadu maaha dadka ku caan baxay kolba Xisbi u guurka ee waxaanu ku go’aansanay talo midaysan, markaa Kulmiyena waxaan ka rajaynaynaa in aanu samayn cadaalad daradii aanu UDUB kaga nimid ee uu Abaalka beesha ogaado” Ayuu Yidhi Mujaahid Ibraahin Cali Daray

Odayaasha iyaguna Munaasibadaasi ka hadlay waxa ka mid ahaa Maxamuud Aadan Dheri oo Bulshada reer Togdheer ugu baaqay in ay si midaysan Codkooda u siiyaan Xisbiga KULMIYE” Reer Togdheer waxaan leeyahay waad aragtaan Xaalada wadanku ku jiro, e maanta Codkiina siiya KULMIYE ayaa Gurmad idiinku dhow, e Bari Iyo Galbeed ba waayo? Wadanku badbaado ayuu u baahan yahay” Ayaa ka mid ahaa Ereyadiisii

Munaasibadani oo ay ka qayb galeen dad ku dhow 200 oo Xubnood oo isugu jira Cuqaal, Ganacsato, Iyo Dhalinyaro ayaa sidoo kale waxa hadal koban ka jeediyay Badhasaabkii hore ee gobolka Togdheer Cabdi Xuseen Dheere

“Dhabtii Libaaxu Maanta KULMIYE ayay ku soo Biirtay ee Tolo Maxay Odhan UDUB, beeshan aan arkona ma ogi meel ay dhogortii libaaxu kaga maqan tahay, markaa waxaan ka baqayaa markay UDUB aragto awooda ka wareegtay in ay Doorashaba qaban waydo oo ay Mudo-kordhin uun dabada inoo qabatee Malaha waxa wacnayn in aynu shirarka noocan ah Qorsoodi ka dhigano” Ayuu Yidhi Cabdi Xuseen Dheere

Waxa kale oo madashaasi ka hadlay Eng Cali Siciid Raygal iyo Maxamuud Salaan Maxamuud oo ka mid ah Masuuliyiinta Xisbiga KULMIYE ee Gobolka Togdheer, iyo qaar ka mid ah Xildhibaanada Golaha deegaanka ee KULMIYE ka Soo baxay

Sidoo kale munaasibadani ayaa ahayd mid si heersare ah loo soo agaasimay, waxana ka qayb galay dad tiradoodu ku dhawday 200 oo Xubnood

Foosi Saleebaan Aw-Bindhe
Somaliland.org Burco

Banaan Baxa Burco: 19 Cisho Ayey Sharci Daro Ku Fadhidaa Xukumada Daahir Riyaale Kursigii Somaliland

Banaan Baxa Burco: 19 Cisho Ayey Sharci Daro Ku Fadhidaa Xukumada Daahir Riyaale Kursigii Somaliland
20 Apr, 2009 -

Dadweyne tiro badan oo u badan Taageerayaasha Xisbiga Mucaaridka ah ee Kulmiye ayaa saaka isugu soo baxay barxada weyn ee ku taal Xarunta Xisbiga ee Magaaladan Burco. Isku soo baxan oo ay kasoo qayb galeen Madaxda Kulmiye ee Gobolka Togdheer, Siyaasiyiin, Mujaahidiin, Qurbajoog waayeel iyo dhaliyaroba, Odayaal, Suugaan-yahano iyo dhamaan Taageerayaasha kala duwan ee Xisbiga.

Intii aanay bilaabin qudbadaha masuuliyiinta xibiga kulmiye ee Gobolka Togdheer waxaa goobta la keenay ciidamda booliska oo wata buurta ciidanka, balse ma jiran wax fad qalalo ah oo ka dhalatay joogitaanka booliska.

Waxaa fagaaraha u baxay intii aanay bilaabin hadaladu oday Faarax Xadhigle isla markaana ku war geliyey shacabka in ay boolisku u joogaan goobta arimaha nabad galyada isla markaana ay ka wara hayanaan.

Bananbaxan waxa ugu horeynba ka hadlay Dr.Cabdi Aw.Daahir oo ah Gox-hayaha Guud ee Caafimaadka Xisbiga Kulmiye, waxaana ka mid ahaa hadaladiisi:-

"Maanta waxaynu isugu-soo baxnay halkan Banaan-bax ka jira Dhamaan dalka somaliland Degmo iyo Gobolba, oo Xisbiga Kulmiye Taageerayaashiisa iyo shacab weynaha reer soomaalilandba ay dhagaysanayaan maanta khudbadaha Madaxdooda iyo Hogaankooda.

Hal-haysta Kulmiyena waa labada kelmadood ee Nabad iyo Isbedel.

Nabadgelyadana inagaa aasaas u ah, oo dhisnay, Tiirinayna, doonaynana inay sal dhigto, waxaanaynu ku garanaynaa 4 goor ayaa halkan laynagu fara-fareeyey, oo ninka Cirro la yiraahdaa uu inoo soo diray ciidamo oo waliba damcay in uu khal-khal iyo fid-mana abuuro, kumanuu guulaysan.

intaasoo jeerba inaga iyo dadweynaha reer Burco oo nabada jecel inagoo aan qori, xabad iyo dhengadtoona sidan, ee mid qudha sitta oo ah Afkeena iyo dadka oo aan wax u sheegno.

Dr. Cabdi Daahir oo kusii dheeraaday Khudbadiisa ayaa xusay in mawqifkoodu yahay kii uu xisbigu hore u qaatay 6-dii April, waxaana ka mid ahaa hadaladiisi:-

'Inaga Kulmiye ahaan mawqifkeenu waa wakhtigii Daahir Riyaale loo qabtay oo 6/Abri ahayd wqaa dhamaaday mana aqoonsanin.

Waxaynuse diyaar u nahay inaynu wada hadalno oo wixii xal ah ee lagu samaynaayo Maamul dhexe oo dalka doorasho gaadhsiiya oo Hantida , Tilifishanka iyo Askarta Qaranka aanu xisbina ku adeegan.

Halkan waxa inoogu yimid Taliyiihii ciidanka oo aan darajo lahayn, lamana kala garanayo kii laba xidig laha ahaa iyo kii kale,

IInsha Allana maantaynu talada qabsano waxay wada yeelanayaan Darajooyin".

Geesta kale waxaa isna halkaasi ka soo jeediyey hadalo aad u cad cad Xil: Cali Siciid Raygal, qudbadiisa aad ayuu ugu dheeraday waxaanu sheegay in xukumada Maddaxweyne Riyaale ay kursiga ku fadhido mudo 19 cisho ah sifo aan sharci ahayn, waxaana ka mid ahaa hadaladiisii:-

" Waad ogtihiin oo 19 cisho ayey sharci daro ku fadhidaa xukumada Daahir Riyaale kursigii somaliland, waana arin aad iyo aad u nasiib daro ah dal dhan oo maddaxbanaan oo doorasho u diyaar ah in xukun kiisa sii hayaa dad ay ka dhamaatay mudadii xilkoodu, waana waxa aan aduun yada hore uga dhicin"

ugu danbayntii Xil Cali Siciid Raygal waxa uu faray taageerayaasha xisbiga in ay balan toodu tahay in aanay wax kale u adeegsan sidii ay u ridi lahayeen xukumada balse ay u isticmaalaan hadal, waxaana uu yidhi

" Waxaa inoo balan ah hadii aynu nahay taageerayaasha xisbiga Kulmiye, nabad galyo, xasilooni, banaan-baxyo, iyio afkaarteen iyo shucuurteena oo aynu cabirno oo kaliya in aynu kaga ridno rajiimkaas iskaga fadhiya ee iska malaf-sanaya, ee xoolaha xaarnta bartay"

Waxaanu isku soo baxani ku dhamaad si ay ku dheehantahay nabad galyo iyo xasilooni, shacabku waxay goobta ka dareereen iyaga oo ku niyadsan qudbadihii masuuliyiinta.







Source: Hadhwanaagnews

DAAHIR RIYAALE WAXAAN U SOO JEEDINAYAA IN UU QAATO GO,AAN KU QADHAADH DANTIISA SIYAASADEED EE GAARKA AH,BALSE WAXTAR U AH DALKA IYO DADKABA 2009o420

DAAHIR RIYAALE WAXAAN U SOO JEEDINAYAA IN UU QAATO GO,AAN KU QADHAADH DANTIISA SIYAASADEED EE GAARKA AH,BALSE WAXTAR U AH DALKA IYO DADKABA


Burco (SYL)- Dr. Cabdi Aw Daahir Cali oo ka mid ah masuuliyiinta sare ee xisbiga KULMIYE, ayaa waraysi khaas ah oo uu la yeeshay weriyaha Jmahuuriya ee Gobolada Bariga Somaliland Mr. Keyse Axmed Digaale, waxa uu kaga hadlay khilaafka siyaasadeed ee hadda ka taagan dalka, sida xalku ku iman karo iyo arrimo kale oo xiiso badan.

Waraysigaas oo Dr. Cabdi Aw Daahir kaga jawaabay su�aalo tiro badan oo taabanaya dhinacyo kala duwan, waxa uu u dhacay sidan:

Jamhuuriya: Maalmihii ugu dambeeyay toddobaadkii hore waxaad kulamo la yeelateen guddiga nabadgelyada Gobolka Togdheer, maxaad ka wadahadasheen, maxaadse isla gaadheen?

Cabdi Aw Daahir: Horta waa taad ogeydeen oo awamiir xagga sare kaga timi maamulka gobolka ayaa kelliftay inay dhawr jeer isku dayeen in ciidamo u soo diraan si loo fadqalaleeyo kulamo xisbiga KULMIYE si nabadgelyo ah isugu soo baxay fagaaraha xafiiska xisbiga, inkastoo aanay ku guulaysan waxba may xeerinayn.

Waxaan goosanay in aan odayaasha maamulka gobolka, degmada iyo ciidammada la kulanno, si aanay arrimihii hore oo kale u dhicin, nabadgelyada magaladana aannu si fiican uga wada shaqayno, laba kulan oo aanu wada yeelanay maalintii hore waxay noogu muuqdeen niman u arkayey in taladayada xalku ku jiro.

Maalin labaadii waxay ahaayeen niman uu soo gaadhay amarkii Wasiirka Daakhiligu ee uu lahaa xisbiga KULMIYE xafiisyadiisa kulamo kuma qaban karo, markaas amarkaas ayaa taladii dhabta ahayd ee danta gobolka iyo magaaladuba ku jirtay ka feyday maskaxdoodii, haddana waxaannu ku ballanay kulan saddexaad oo casho ah, balse waqti dambe ayey ka cudurdaarteen, iyagaanuna ka sugaynaa jawaabta, welina way isla maqan yihiin.

Jamhuuriya: Guddoomiye-ku-xigeenka 1aad ee xisbiga KULMIYE wuxuu dhawaan waraysi uu bixiyey ku sheegay in aanay dawlad sharci-darro ah doorasho la galayn, taas macnaheedu miyaanu ahayn KULMIYE doorsho ma doonaayo oo isagaa cimri-dherer u samaynaya xukuumadda?

Cabdi Aw Daahir: Labada murrashax ee Faysal iyo Axmed Silaanyo waxay miidaanka doorashada imanayaan iyagoo aan hanti qaranku leeyahay adeegsanayn, haseyeeshee musharraxa saddexaad ee Dahir Rayaale wuxuu isticmaalaya hantidii qaranka, warbaahintii qaranka, ciidammadii qaranka, haddana wuxuu ku fadhiyaa xilkii madaxtinamada qaran oo sharciyadiisii ahayd 5 tii sannadood ka dhammaatay, tii xisbiyadu isla garteen ee ku-meel-gaadhka aheydna ka dhammaatay, wuxuu yidhi; waxaan ku joogayaa korodhsiimo aan dhammaanayn oo Guurtida iyo isagu darandooriyayaan oo ah waan idiin kordhinayaa ee idinna ii kordhiya, markaa sharci-darro ayuu ku fadhiyaa.

Waxa doorasho lagu geli karaa oo keliya hantida qaranka iyo warbaahinta qaranka oo meel leys la dhigo sidii aan qolona u isticmaalin, sharciyadda madaxtooyada oo laga wadahadlo meelna laysla dhigo ciddii doorasho xaq ah oo xalaal ah ina gaadhsiin lahaa.

Jamhuuriya: Kordhintii hore ee Guurtida waad aqbasheen, haddana waa diideen kordhintii dambe, maxay ku kala geddisan yihiin soo Guurtidii uun maaha?

Cabdi Aw Daahir: Waa taa wada ogeydiin oo labada jeer midnaba maanaan yeelin oo isugu kaaya mid bay ahaayeen oo tii horena labada xisbiba waatay dhawaaqa dheer iyo diidmadaba ka bixiyeen, oggolaanshihiina wuxuu ku yimi wadahadal dheer oo dhexmaray saddexda xisbi, laguna heshiiyay qodobo ay aasaas u ahaayeen laba arrimood oo kala ah; ballanqaad ka yimi Rayaale inaanay mar dambe dib u dhici doonin doorashadu iyo ta labaad oo ahayd habkii iyo nidaamkii UDUB looga xakameyn lahaa ku isticmaalka hantida qaranka loollanka doorashada, labadaas arrimood awgood ayaanu ku tanasulnay. Labadii arrimood UDUB iyo Rayaale midna ma yeelin, sannadkii mar labaad buu ka dhacay isagoo aan waxba qaban, hantidii qarankana sidiibay ugu isticmaalayaan hawlaha iyo ololaha xisbigooda, markaa waxaannu leenahay korodhsiimo aan joogsanayn lama wadi karo, doorasho aan xaq iyo xalaal ahayna lama geli karo.

Jamhuuriya: Sidaad ka warqabto intii aanay guurtidu ku dhawaaqin mudda kordhinta xisbiga KULMIYE wuxuu muujinayay soo dhawayn badan oo dhinaca Guurtida ah, haddana ganafka ayaad ku dhufateen, ma waxa jiray arrimo sir ah oo aad isla ogaydeen oo Guurtidu ka baxeen?

Cabdi Aw Daahir: Marnaba maanaan waafaqsanayn mooshinka ah in Guurtidu ka doodo in loo kordhiyo amma aan loo kordhin, kaas waxa soo dhigay Rayaale oo sidii la wada ogaa horgeeyay Golaha Guurtida. Mowqikayagu wuu caddaa, wuxuu ahaa labada aqal haysu yimaaddeen oo dabcan Guurtiduna ka mid tahay, sharciyad dambe oo dib loogu kordhin karaa ma jirto, aafo loo adeegasadaa ma jirto qodobkii 83, markaa labada gole ha ka tashadeen xalkii loo samayn lahaa maamul loo wada dhan yahay oo dalka doorasho gaadhsiiya, markaa wax sir ah oo Guurtida naga dhexaysay may jirin, mana jiri karaan ee ujeeddooyinkayaga labadayada dhinac ee KULMIYE iyo UDUB way caddaayeen; kaayagu wuxuu ahaa in qaabka korodhsiimo la soo afjaro, isla markaana aanay bannaanaan madaxtinimada dalku wixii ka dambeeya 6 April, lana sameeyo maamul dhexdhexaad ah oo dalka doorasho gaadhsiisa. Ta Rayaale-na waxay ahayd Guurtidu ha ii kordhiso oo aan sidaydii isaga sii fadhiyo weligay anigoo aan doorasho gelin, amma ha diideen oo aan dadka ku cabsi geliyo cidla� ayaa lagu dhacayaa oo dadku weligood xarajkaa haygu jiro.

Jamhuuriya: Dhawaan masuuliyiinta sare ee xisbiga KULMIYE waxay booqdeen talisyada booliska iyo milatariga, waxana halkaas lagu siiyay salaam-sharaf ah, dad badan ayaa ku tilmaamay in ay arrintaasi xaal-marin tahay falkii 6 April ee ciidammada boolisku kula kaceen guddoomiyaha xisbiga KULMIYE iyo taagerayashiisu rasaas ku fureen, arrintaas maxaa ka jira?

Cabdi Aw Daahir: Horta falkii dhacay 6dii abril waxaa masuuliyadeeda iska lahaa dhammaanteed Daahir Rayaale, shacabka reer Somalilaandna maalintaa waxba ulamuu hadhin, teellana umuu dhigin ee qaddarka Ilaahay ayey ku baaqatay in dhimasho iyo dhaawacba timaad, Ilaahayna wuxuu innaga baajiyay khalkhal innagu dhici lahaa, haddii sidii UDUB u rabtay u dhici lahayd. Waa mid ka mid ah taannu lahayn in ciidammada qaranka Rayaale u isticmaalayo loollanka xisbigiisa UDUB iyo difaaca kursigiisa, weliba si foolxun oo cadaawadeed ayaa maalintaas u dheereyd.

Taliyayaasha ciidammadu wax dheeraad ah namay siin, waxbana noomay dhimin. Maalintii dhowayd waxay noola muuqdeen niman hawshooda ciidannimo yaqaan, shaqsiyad qofeedna leh.

Jamhuuriya: Waxaad ku adkaysanaysaan mawqifkiinii aad ku diidanaydeen muddo-kordhinta, xukuumadduna waxay ku adkaysanaysaa muddo-kordhintii Guurtidu u samaysay, xaalkuna waa minddi-minddi-ku-taag, markaa maxaad xal u aragtaa?

Cabdi Aw Daahir: Arrintaas jawaabteedu waa caddaan waanay kooban tahay; mid waa mowqifgayaga oo korodhsiimo aan aafo la xidhiidhin waa sharci-darro, mana aqbalayno, midna waa maxaa xal ah, taana hore ayaannu mowqifkayaga ugu caddaynay oo wax allaalyo wixii wadahadal iyo wadatashi ah oo intay saamaysaa dhinacyada ka wada joogto diyaar baanu u nahay, laguna dhammeeyo mushkiladdan, looguna helo xal waara oo lagu wada qanci karo, khilaafaadkaasna soo afjara ee yaa bal ku qanciya Daahir Rayaale oo doonaaya inuu isku darsado ummaddana madax u noqo, mintidna noqdo aan waxba xeerinayn.

Jamhuuriya: Haddaan ka yara baxno dhinaca siyaasadda muddo fadhigaagu wuxuu ahaa Burco, waxa kaa muuqata nasasho iyo degenaansho badan, si wanaagsan ayaad ugu faa�iidaysatay xirfadaaddii dhakhtarnimo, dad badan ayaad ku daweysay, dhaqaale badanna wuu ku soo galay, markaa miyaan la odhan Karin hawsha siyaasadda waxa kaaga fiican xirfadaadda?

Cabdi Aw Daahir: Horta keysow, xirfadayda dhaqtarimo wax aan barbardhigi karaa ma jirto, waayo naftayda iyo noloshayda ayey ku tallaalantahay, waana deeq Ilaaha i siiyey aan ugu mahadnaqayo, ummaddaydana aan wax ugu qabanayaa. Maalintiina ugu yaraan siddeed saacadood waqtigayga hawsha dhaqtarnimo ayaan siiyaa, hawsha siyaasadeedna waxaan u arkaa haddii si fiican oo Alla ka cabsina ku jirto loo fuliyo inay tahay aasaaska nolosha, imminkana muddo saacado ah ayaan toddobaadkiiba waqtigayga siiyaa oo xisbigayga talooyin aan u arko in ummadda iyo dalkaba wax tarayaan ku biiriyaa.

Labada arrimood aniga way isu kay kaabaan oo markaan joogo goobaha caafimaadka naxariista aan dadka jilicsan ee buka u muujiyaa waxay i dareensiisaa dhibta dadka jilicsan ee aan nolol-maalmeedka haysan oo qaba daryeel la�aan iyo ogaal la�aan dhinaca maamulka maanta jira ka timi, markaan joogo goobaha siyaasaddana waxaan xaqiiqsadaa in isbeddel yimaad oo ah maamul wanaagsan iyo dhaqaalaha dalka oo la kobciyaa in wax weyn ka tarayso amma ay aasaasba u tahay daryeelka caafimaadka bulshada. Siyaasaddu ma aha oo keliya in aad noqoto madaxweyne amma wasiir, badhasaab amma aad yeelato awood xoog badan oo aad hantida iyo haybadda qaranka ku isticmaaasho si xadgudub ah.

Jamhuuriya: Dr. Cabdi, dad badan ayaa qaba in hoggaanka sare ee xisbiga KULMIYE yihin niman xilal sare ka soo qabtay xukuumadihii soo maray Somaliland, si wacana loo yaqaan, sidaas darteed isbeddellada aad soo wadaan aanay waxba ka duwanayn kuwii hore loo arkay, taas miyaan la odhan karin caqabad ayey idinku ku tahay?

Cabdi Aw Daahir: Hoggaanka xisbiga KULMIYE wuxuu ka kooban yahay dhammaan bulsho-weynta qaybaheeda kala duwan oo ah kuwii waayo-aragnimada kala duwanaa lahaa, kuwa leh dhiig cusub iyo kuwo leh waayo-aragnimo debedda ah intuba way iskaabayaan. Waxaan kaloon kuu sheegayaa, marka laga reebo muddadii toddobada sannadood ahayd ee ugu dambeeyey isbeddelka la sameeyayna ee keliyana uu ahaa korodhsiimo, intii ka horreysayba 1981-2002 waxa dalka ka dhacayey isbeddello dhab ah oo isdaba-joog ah oo ahaa aasaaskii SNM, xorayntii dalka, ku-dhawaaqiddii Somaliland, ku wareejintii xilka dalka beelaha Somaliland, qaramayntii ciidammada beelaha, ka diga-rogoshadii qaabkii beelaha iyo u guurkii qaabka axsaabta badan. Intaasoo dhami waxay ahaayeen isbeddello dhab ah oo la soo sameeyay, inkastoo raggii isbeddelladaas soo sameeyay ay ku jiraan KULMIYE, haddana isbeddelku ma aha UDUB ku beddel KULMIYE amma Rayaale ku beddel Siilaanyo ee waa maamul-xumo ku beddel maamul-wanaag, musuqmaasaq ku beddel la xisaabtan, shaqo la�aan iyo tahriib ku beddel shaqo-abuur, sicir-barar ku beddel maciishad jaban, suuq kooto ah ku beddel suuq xor ah iyo qaar kaloo badan, waana taas ta KULMIYE ka duulayo ee uu ummaddana leeyahay nagu doorta.

Jamhuuriya: Wasiirka Daakhiligu wuxuu soo saaray go�aan uu ku joojinayo isu-soo-baxyada xisbiyada inta aan la gaadhin doorashada, sidee bay arrintaasi kuula muuqataa?

Cabdi Aw Daahir: Go�aankaas Cabdillaahi Cirro ma aha mid sharci ah. Weliba wuxuu ku darsaday khalkhal iyo fitmo abuuris, aqoon la�aanina kama taggana. Bal ogow ololaha doorashadu waxay leedahay waqti gaar ah oo ah bisha doorashada ka horreysa, arrin gaara oo ah baratanka iyo loollanka doorashada iyo dad gaar ah oo ah musharraxiinta iyo taageerayaashooda. Haseyeeshee, ololaha doorashada iyo bannaanbaxyadu way kala duwan yihiin; bannaanbaxyadu markasta way furan yihiin shanta sannadoodba, waxaanay khuseeyaan arrin kasta amma ha ahaato taageero amma diidmo oo arrin kasta ah oo ay ugu yar tahay biyo la�aan ka dhacday xaafad oo lagu bannaanbaxo amma dawladdii oo si sharci-darro ah ku iibisay khayraadkii iyo kalluunkii badda.

Ta maanta KULMIYE isugu soo baxayaa ma aha ololaha doorashada madaxweynaha ee waxaan isugu soo baxaynaa in ummadda aan u muujino sharci-darrada muddo-kordhinta.

Jamhuuriya: Ma suurtogeli kartaa in KULMIYE aqbalo muddo-kordhinta Guurtida si doorashaduna u qabsoonto xilligaas, xukuumaddana laga qaado dammaanad aan markale la samayn muddo-kordhin, mise waxaad haysaan darriiq ka duwan taas oo doorashadu ku qabsoomi karto waqtigeedii si nabadgalyo ah, kuna wada qanci kartaan saddexdiina xisbi qaran?

Cabdi Aw Daahir: Waxa mowqifkayagu yahay in muddo-korhinta Guurtidu tahay sharci-darro, waxaan kaloo aaminsannahay xalka khilaafaadkaas lagu dhammayn karaa inuu yahay wadatashi inta khusaysaa isugu timaad, laguna gaaadho go�aan cid kastaaba ku qanacdo. Go�aankaas waxaannu aaminsannahay inay saldhig u noqoto in la qabto doorasho aan dib u dhicin oo xor iyo xalaal ah, xortaas iyo xalaashasu ma aha ta been-beenta ah ee ay afka ka sheegaan UDUB, balse waa mid ah in aan hantida qaranka, warbaahinta qaranka, ciidammada qaranka iyo haybadda qaranka aan cid gaar ah, xisbi gaar ah iyo musharrax gaar ah u adeegin, maamulka hawshaas fulinayaana waa inuu noqdaa mid dhexdhexaad ah, dalkana gaadhsiinaya doorashada xornimadeeda iyo xalaasheedu dhab tahay. Cidda maamulkaasi noqonayo iyo qaabka uu yeelanayo annagu astayn mayno ee miiska wadahadalka ayaa lagu go�aamin doonaa, haday dhinaca kale oggolaado wadahadal.

Jamhuuriya: Sidaad u aragtaa dhexdhexaadinta cusub ee ay wadaan xubnaha wasiirada iyo xubnaha xildhibaanada kulmiye ee ay isugu keenayaan Madaxweynaha iyo Siilaanyo, xalse ma keeni kartaa?

Cabdi Aw Daahir: Waa arrin aan aad u soo dhaweynaayo, waanan hambalyaynayaa xildhibaanada iyo wasiiradaba talaabadaa ay u hormoodka yihiin ee ay qaadeen.Waxaanan naawilayaa in wax dadka iyo dalkaba anfaca ka soo baxayaan. Waxaan kaloo aan aaminsanahay in labada dhinac ee wasiirada iyo xildhibaanadu ay hawshay wadaan daacad ka yihiin. Qoladayada kulmiye waxay haystaan kalsoonida xisbigayaga iyo ta Axmed Siilaanyaba, dhinaca Daahir Rayaale waxba weli ka dardaarwarinmaayo, hase ahaatee waxaan u soo jeeddinayaa in lagaaga baahanyahay inaad qaadato go'aan u qadhaadhaan kara dantaada siyaasadeed ee gaarka ah ee maanta kuu muuqata, balse wax tari doona danta dalka iyo dadkaba, iyo taada gaarka ahba mustaqbalka dheer, hadii ilaahay ku waafajiyo.




Jamhuuriya Online

Isu soo bixii Burco ee Xuska Aasaaska Jabhadda SNM (6/Abril/2009) iyo Wasiir lagu qayliyey 20090406

Isu soo bixii Burco ee Xuska Aasaaska Jabhadda SNM (6/Abril/2009) iyo Wasiir lagu qayliyey PDF | Print | E-mail
Monday, 06 April 2009
Burco/Sallaxleynews-Isu soo bax balaadhan oo ay kasoo qayb galeen dhamaan dadweynaha ku nool magaaladan Burco ayaa saaka lagu qabtay xarunta xisbiga Kulmiye ee Gobolkan.
Isu soo baxan ayaa lagu xusaayey maalintii la aas aasay ururkii Dhaq-dhaqaaga Wadaniga Somaliyeed (SNM) 6 Abril sanadkii 1981 sidoo kalena waxay ahayd maalinta Xisbiga Mucaaridka ah ee Kulmiye ku calaamadeeyey inaanu aqoonsan doonin maamulka madaxweyne Rayaale.

Kulankan oo ay soo qaban-qaabiyeen madaxda kala duwan ee xisbiga kuna sugan G/Togdheer,waxa isugu ymid dadweyne aad u tiro badan oo sita Boodhadh iyo calamo ay ku qoran yihiin ereyo lid ku ah xukuumada dalka ka talisa.
Halku dhegyadaas ayey ka mid ahaayen:-
• Riyaale waa danbiile caadayste ah.
• Waxaan ubaahanahay isbedel cusub ee nabasdgelyo Rayaale.
• 6 Abril wixii ka danbeeye majirto Xukuumadi.
• 6 Abril ka dib bixin mayno Cashuur.

Masuuliyiin badan oo isugu jirta Xildhibaano Golaha Wakiilada, Gudiga horumarinta Gobolka Siyaasiyiin iyo Madax kaleba ayaa iyagu joogay isku im aatinkan, waxaanay qudbado u jediyey qaar ka mid ahi Bulshadii kala duwanayd ee tubnayd barxada iyo hareereha xafiiska kulmiye.

Dr. Cabdi Aw Daahir Cali wuxuu ka mid ahaa masuuliyiinta la hadashay dadweynaha, waxaanu ugu horeynba ka waramay dhibaatooyinkii uu xukunkii keli taliska ahaa ee Siyaad Barre kula kicijiray umada iyo waxyaalihii keenay in la aas aaso cid caabida.
Waxa kale oo uu ku dheeraada isbedeladii ka danbeeyey dawladaasi iyo sidii ay u oofiyeen waajibaadkoodi. Dr. cabdi waxaa ka mid ahaa hadaladiisi:- "sadex xukun ayaa isaga danbeeyey dawladii hore. markay SNM qabsatay dalka 2 sano ayey xukumaysay, waajib keedi way garatay oo waxay ku wareejisay shir beeleed. Dawladii shir-beeledka ahayd waxay haysay 1993ilaa 2003. sidoo kale iyana waxay xilkii ku wareejisay dawladii doorashada ku timid ee Daahir Riyaale Kaahin ka madaxda ahaa, taas oo wakhtigeedi ku dhamaaday 2008.Hadaba labadii qoloba waajibkoodi way fuliyeen, maamulka maantuna wuxuu marayaa markii sadexaad ee loo kordhiyo. Xisbiga Kulmiye nabadgelyo xumayn maayo, Askartani waa askartoodi, kelmaduu leeyahay xisbigu waxa weeyi waar dooraashadii aynu ku balanay hala qabto.
waxaan kusoo gebe-gebaynayaa maanta maalinteedi maaha, go'aankiina waynakii qaadanay. 6 Abril bay ku dhan tahay tii madaxweynaha iyo ku xigeenkiisu.

7Abril kumaan darin, maantase taladu gacantooday ku jirtaa, anigu waxaan odhan lahaa waxay ku jirtaa qodobadeenee hala tashado, kulmiyana ma diidana. waa inaan wada tashano, si fiican u wadahadalno, aayaha dalka eegno, idinkuna aad iska daysaan bambadaa aad tidhaahdeen waan idinku qarxinaynaa. anagu waxaanu nahay Bayloodka hagaaya, kaaso dulqaadanaya samraayana, ee rakaabka aan sidno aan badbaadino.
Taladuna waxay ka go'daa madxweyne rayaale ee hala tashado maanta.maanta maanta. maanta. maanta. maanta. maanta. maanta".

waxa kale oo ay madaxdii kala duwanayd ee goobtaas ku Sugnayd ay Bulshadii kala duwanayd ay u sheegeen inay nabadgelyada iyo Xasiloonida ilaaliyaan, iyagoo ku tilmaamay inay dan u tahay umada.

Dhanka kalena lagu mudaharaaday wasiirka wasaarada Warshadaha iyo ganacsiga md.Maxamed Saleebaan Maxamed oo ka soo qayb galay xuskaas, waxa uuna kala kulmay dhagax ciid iyo waliba cay dadweynihi gadoodsanaa ee halkaa ku sugnaa.
Wasiirku waxa uu ahaa masuulka keliya ee xukuumada ka joogay, weji gabax-na meesha kala kulmay dadka meesha joogay oo muuqday qaar taageero aad u baaladhan u haya xisbiga mucaardka ah ee kulmiye, dhinaca kale waxaa iyaguna.

Wasiirka waxa kala baxay meeshaas ciidamada nabadgelyada oo si aad ah u ilaalinaayey kulankan,oo iskuna dayey markii hore inay joojiyaanba soo baxan, balse mari waayey dadweynihii halkaa isugu yimid.

Ugu danbayn isu soo baxan ayaa ku dhamaaday si nabadgelyo ah, guud ahaan jawiga Burcana aad ayuu u degan yahay inkasta oo ay ciidamada amaanka oo aad u qalabaysani tuban yihii meel kasta oo magaalada ka mid ah

Reportedby:Saado Cabdilaahi Xasan
Sallaxleynews, Burco/S/land
Hooyo_one@hotmail.comThis e-mail address is being protected from spam bots, you need JavaScript enabled to view it

Shirkii kulmiye ee maanta xarunta Burco kadhacay 20090325.

Shirkii kulmiye ee maanta xarunta Burco kadhacay.

Badheedhii kulmiye iyo wajigabixii uu dadweynaha kala kulmay Badhasaabka Burco


Xisbiga mucaaridka ah ee Kulmiye ayaa manta shir jaraa’id oo aad u balaadhan ku qabtay xafiiskiisa magaalada Burco
Shirkaasi oo ay ka sooqayb galaan xubno ka tirsan golaha dhexe ee xisbiga kulmiye, garabyada haweenka iyo dhalinyarada ee xisbiga kulmiye iyo gudoomiyaha xisbiga kulmiye ee gobolka togdheer Md Sahal Aadan Maxamed,

Ugu horayn waxaa shirkaasi furitaankiisi ka hadlay Gudoomiyaha Gobolka ee xisbiga Kulmiye Md Sahal Aadan Maxamed isaga oo sheegay in sababta ugu weyn ee ay shirkan u soo abaabuleen tahay inay ku taageeraan go’aankii xisbiga kulmiye ka soo saaray mudo kordhintii ay Golaha Guurtida Somaliland mudada lixda bilood ah ugu kordhiyeen madaxweynaha iyo ku xigeenkiisa go’aan kaasi oo uu xisbiga kulmiye ku tilmaamay mid aan dastuurka dalka waafaqsanayn iyo shuruucda dalka utaala,

Md Sahal mar uu kahadlaayey siday u arkaan ka gobol ahaan go’aankaasi waxa uu yidhi “ manta waxaanu halkan isugu nimi in aan dadweynha u cadayno in aanu ka soo horjeedo go’aankii ay Guurtidu mudo kordhinta ugu sameeyeen madaxweynaha iyo ku xigeenkiisa, taageersanahayna go’aankii uu horay xisbugu uga soo saarey hargeysa,
Shucuubtayadana u tusno cidkasta una cadayno in arintan soo jiitantay, tacbaanka ah, ee qayral dastuuka ah ka soo horjeedno ,
Markale isagoo hadlkiisii wata Md sahal waxa uu yidhi “ kama yeelayno cabudhinta, cagajuglaynta, xadhiga lagu hayo saxaafada ee uu wado xukunkan tabarta yare e wakhtigiisi 4 cisho ka hadhay”

Mar uu kahadlaayey Md sahal Gudida nabadgalyada ee Gobolka Togdheer iyo maamulka Gobolka ayuu sheegay in maamulkii gobolku uu dayacay masuuliyadiisi ayna noqdeen u adeegayaal xisbiga talada haya ee UDUB
“ waxaan leeyahay maamulka Gobolka in aydaan matalin dadweynaha maadaama aydun mateshaan UDUB”

Dr. cabdi aw-daahir oo isna ka hadlay shirkaasi ayaa sheegay in xisbiga kulmiye sinaba u aqbalayn go’aanka Guurtida

wixii 6 April 2009 ka danbeeyana aanay madaxweynha iyo ku xigeenkiisa u aqoonsanayn madaxweyne iyo ku xigeen ee ay u aqoonsanyihiin Gudoomiyaha iyo G/kuxigeenka xisbiga UDUB

go’aankii guurtiduna uu ahaa go’aan xanbaarsan burburin iyo maroorsi kaasi oo aan danta ummada meelnaba ka soogalayn,
halka uu ku tilmaamay go’aanki xisbiga kulmiye mid ku dhisan dabta ummada

Dr .cabdi aw-daahir waxaa kamid ahaa hadaladiisi “ mawqifkii iyo go’aankii guurtidu wuxuu ahaa mid ku dhisan burburin iyo maroorsi shuruucdii dalka ayaana lagu gafay. Go’aanka xisbiga kulmiyena waxa uu ku dhisanyahay wax hagaajin, badbaada ummada iyo rabitaanka shacabka, waar maxay dadweynuhu markhaatiga u furi la’yihiin,

Loo kordhi oo loo kordhiye miyaa lagu sii wadayaa ma ilaa waxa uu rabaa inuu 21 sano ee ina siyaad loou kordhiya uun,
Ina Siyaad Bare waaba uu dhaamay kan oo isagu waxa uu qabtay ilaa 5 doorasho oo uu isagu kaligii musharax ahaa kuwaasi oo intuu goboladda kala geeyo hadhawna o dhan jiray waxaan ku fooday 99% laakiin kani waxaabu yidhi doorashoba dhici mayso oo 82 nin uun buu leeyahay ii kordhiya,

Dr cabdi aw-daahir mar uu kahadlaayey dayaca iyo xilgudasho la’aanta uu sameeyey maamulka madaxweyne riyaale waxa hadaladiisi ka mid ahaa ‘ dalkan waxaa ka qabsoontay saddex doorasho, doorashadii dawladaha hoose iyo doorshadii madaxweynha lacagtoodii lagu qabanlahaa waxay ahayd mi lasii diyaariyey oo marxuumkii [ madaxweyne Cigaal] ayaa sii diyaariyey oo riyaale iyadoo diyaarsan ayuu meesha yimi markaa bal qiime hadii daahir riyaale ay ku soo beegmi lahaayeen may qabsoonteen waayo tii uu joogay ayaa ilaa iyo imaka aan dhicin oo marba uu wax ku cudurdaaranaayaa mar uu yidhaa qaarbaa na qarxiyey,jiilaalba jira, barwaaqa jirta serfarkiiba aan dhamaanin marba meel buu eeda saaraa, koomiishanku waa siidhi wale ee doorashada waxaa ka masuula dawlada iyadiina waxay leedahay siidhi walayaashii baanu u diray oo aan wali soo dhamayn, waxaan leenahay daahir riyaale waar kubba kilikilada ka soo saar oo dhulka dhig halagula ciyaare”









Kadib intaas waxa uu Dr aw-daahir soo bandhigay barnaamijka xisbiga Kulmiye ee uu wakhtiyada u horeeya ee u qorshaysan haday talada dalka qabsadaan




1. waxaanu 4 bilood ee u horeeya ciidamada qaranka iyo kuwa police kalabadaba waxaanu u samayn doonaa darajooyin mushahaarkana waanu u kordhinaynaa, madaxweynahan koofiyad casta watana waanu ka daynaynaa oo wuxuu noqondoona madaxweyna dalkoo dhan mara oo civil ah




2. xoolahan ninka kaliya kootada lagu siiyeyna waxaanu ka dhigayna kuwo ay dhoofinkaraan tujaarta dalka iyo shacabkuba

3. wershada SIBIDHKA ee berbera waxaanu u ogalaandoona inay ganacsatada dalku maalgashato oo la furo
4. waxaanu samayndoona shaqo abuuris, macaliimiinta,iyo jamacadaha ayaanu aad wax uga qabandoonaa




5. cashuur dhimis baanu samaynaynaa




6. waxaa la xadidayaa mushaharka madaxweynaha ee xad dhaafka ah




7. giinbaarta burco waanu badalidoona









waxaa isna hadal kooban oo xikmadaysan soo jeediyey gudoomiyaha wal bari, waxaana uu ilaahay ugu baryey in BAARLAMAANKA dalka bal nasakhan haysta alle ka qaado oo ay gartaan waajibaadkooda









shirkii oo halkaa maraya ayaa waxaa mikirifoonka lagu soo dhaweeyey Faarax Xadhigle oo la sheegay inuu hayo war degdega oo markaa soo gaadhay shirka waxaanu yidhi “ waxaa imika isoogaadhay in Golihii wasiiradu xalay shiray go’aana ay soosaareen ah in Gudoomiyaha Xisbiga Kulmiye iyo 4 G/kuxigeeno la soo xidho”




hadalkaasi oo buuq iyo cadho badan ka dhex kiciyey dadweynihii shirka ka soo qaybgalay balse markii danbe iska qaboobay iyo gudida nabadgalyada gobolkuna ay soo sareen go’aan ah inaan cidina wax muda haraada samayn Karin









gabagebadii shirka waxaa soo xidhay gudoomiyaha xisbiga ee Burco Md sahal Aadan waxaana uu ku soo gebagebeeyey hadal iskugu jira waano iyo hanjabaad ‘ waxaan leeyahay gududida nabadgelyada ee waraaqaha marba noosoo qoraaya dadweynaha ma meteshaan nabadana dadweynha ayaa ilaalinaaya ee iska jira inaad dadweynha cabudhisaan, waxaan leeyahay




INA BIINOW waa inoo 6 april”









Shirkaasi oo si habsami ah u dhamaaday mana jiraan wax rabshado ah oo uu sbabey shirkaasi oo markii danbe aad moodaysay isu soobax sababtoo ah waxaa ka soo qaybgalay dadweyne aad u tiro badan














Weriye: c/fataax siciid jaamac




Burco,Somali

Axsaabta Mucaaradka oo ka jawaabay hadalkii ka soo yeedhay Madaxweyne Rayaale 20100121

Axsaabta Mucaaradka oo ka jawaabay hadalkii ka soo yeedhay Madaxweyne Rayaale
January 21st, 2010 Comments Off

Hargeysa (Somaliland.Org)- Guddoomiye kuxigeenka koowaad ee xisbiga Mucaaradka ah ee KULMIYE, ahna kusimaha Guddoomiyaha Muj. Muuse Biixi, ayaa sheegay in mar kasta oo uu Madaxweyne Rayaale hadlo uu hanjabaad jeediyo.

Guddoomiyaha oo shalay u waramay Telefishanka Universal, waxa uu si qoto dheer uga hadlay xaalada amaan-darro ku soo kordhay mandaqada Geeska Afrika. “Waxa soo kordhay dagaalo Diineed oo waxa la isku dilayaa Kitaabkii Alle oo ka xoog badan dagaalkii qabiilka ahaa, waxa soo kordhay dhaqaale badan oo ragga Budhcad-baddeeda aha ayaa malaayiin doolar oo baad ah ka qaadaya dawladihii ugu awooda badnaa dunida, waxaana ka mid ah Maraykanka, Ruushka, Shiinaha iyo Ingiriiska. Markaa bal sidii gacan maamul oo Afrikaan ah loogu soo celina lahaa waa arin u baahan qorshe,” ayuu yidhi Muuse Biixi.

Waxa uu sheegay in loo baahan yahay in iskaashi laga sameeyo arrimaha ka taagan Soomaaliya iyo maamul-gobolleedka Waqooyi/bari Soomaaliya ee Puntland. “Somaliland waxay xad la waddaagtaa oo ganacsi ka dhaxeeyaa oo aan dayr ku kala xidhnayn meeshaa intaas oo dagaal ka socdaan. Nasiiib wanaag iyo dedaal badan oo aan samaynay ayaynu weli ku nabdoonahay, waxaanse u malaynayaa in aynaan ku filaan karayn, balse waxayna u baahan tahay is kaashi badan oo gobolku sameeyo. Waxaad ka naxaysaa waxyaabaha ka socda Geeska, dagaalo way dhaaftay,” ayuu raaciyay.

Guddoomiye kuxigeenka koowaad ee KULMIYE, waxa uu ka hadlay sida uu u arko hadal dheer oo Madaxweyne Rayaale Salaasadii warbaahinta mariyay. “Markasta oo uu hadlayo (Madaxweynuhu) waa uu hanjabaa, taasina waxa ku tusinaysaa…Wuxuu ka hadlay laba qodob – odayaasha iyo Madaxdhaqmeedka wuu dedafeeyay, ganacsatadii wuu deedafeeyay, Mucaaridkana waxa uu ku eedeeyay inay cay dibaddaha la wareegayaan, inay Somaliland wax xun ka sheegaan, taasi ma dhacaysoo saddex qolo oo dibadaha u baxay oo aanay dawladdu ku jirin, waxa ay sheegeen in aan imika ka hor arrin Somaliland leedahay oo rasmi ah aanay soo gaadhin,” ayuu yidhi Muj. Muuse Biixi. Wuxuuna intaa raaciyay; “Komishankaa qaranku markii ay Kenya tageen, waxay sheegeen inay shir jaraa’id ku qabteen, markii ay ogaadeen inaan wax Somaliland ka hadlayaaba gaadhin dawladda (Kenya) iyo agteeda toona; labada Xisbi Mucaarid waxay shir kula yeesheen magaalada Bristol (magaalo Ingiriiska ku taala) qolo Yurubiyaan ah, qolodaasina qoraalkoodii ayaanu haynaa oo waxay yidhaahdeen; ‘waligayo wax sidaas nooga xog-warama Somaliland oo arrimaheeda iyo dhibaatooyinka idin haysta manaan arag.”

Dhinaca kale, Guddoomiye kuxigeenka xisbiga Mucaaradka ah ee UCID, ahna kusimaha Guddoomiyaha Aadam Maxamed Mire (Waqaf), ayaa ka hadlay sida uu u arko hadalkii uu doraad jeediyay Madaxweyne Rayaale. “Hadalkii Madaxweynaha laga sugayay isagoo muddo aamusnaa, waxa uu noqday mid wax kala fogaynaya oo xaalad aan loo baahnayn ayuu ka hadlay, kaasoo inuu wax sii shido mooyee aan wax hagaajinayn oo aanu ka hadal nabadgalyo-xumida ka jirta gobolka Sool iyo Saaxil oo iyadana ay xaalad xaga nabadgalyada ahi ka jirto,” ayuu yidhi Mr. Waqaf. Wuxuuna intaa raaciyay; “Waxaynu ognahay in laba qof si badheedha loogu dilay Wajaale, waxaanan leeyahay Ilaahay janadii haka waraabiyo. Waxaanu u arkaynaa xaalad nabadgalyada dhib wayn u keeni karta, iyadoo ay arimahaasi oo dhami jiraan, loona baahnaa inay Xukuumaddu ka hadasho sidii loo daawayn lahaa, haddana waxaad moodaa inay u tafoxaydatay inay wax ka sheegto Qurbajooga Somaliland oo ay tidhaahdo; ‘qaadhaanka aad bixinaysaan waxaad ku bixisaan Somaliland ma jirto, waxaanan leeyahay taas ma geyaan Qurbajoogu, waayo waxay kaalin wayn ka qaateen dib-u-dhiska iyo horumarka dhaqaale ee dalka.”

Guddoomiye kuxigeenka UCID waxa uu sheegay in socdaalada hoggaamiyeyaasha Mucaaradku haatan ku marayaan dalalka Yurub iyo wadanka Maraykanku uu la xidhiidho si loo buuxiyo Xukuumadda oo ka gaabisay inay adduunka ka dhaadhiciso jiritaanka Somaliland iyo waxay qabsatay.

Somaliland.Org

Hargeisa News Desk

Madaxweyne-ku-xigeenka oo Arrimo Caafimaad u Tegay Jarmalka 20100121

Madaxweyne-ku-xigeenka oo Arrimo Caafimaad u Tegay Jarmalka

Ma jiro war rasmi ah oo xukuumaddu ka soo saartay socdaalka madaxweyne-ku-xigeenku ku tagay Jarmalka, hasayeeshee

Hargeysa (GNS)- Madaxweyne-ku-xigeenka Somaliland Md. Axmed Yuusuf Yaasiin, ayaa saqdii dhexe ee habeen hore Madaarka Egal International Airport ee caasimadda Hargeysa ka duulay isagoo ku sii jeeda dalka Jarmalka oo la sheegay inuu u tegay arrimo dhinaca caafimaadkiisa ah.


Ma jiro war rasmi ah oo xukuumaddu ka soo saartay socdaalka madaxweyne-ku-xigeenku ku tagay Jarmalka, hasayeeshee sida xalay Jamhuuriya u xaqiijiyeen ilo wareedyo lagu kalsoon yahay, isla markaana lagu baahiyey shabakadda wararka ee waaheen, waxa safarka madaxweyneku-xigeenku la xidhiidhaa arrimo caafimaadkiisa ah oo beryahanba la hadal-hayey inuu u tegayo dalka Jarmalka.


Md. Yaasiin oo hadda ku sugan magaalada Addis Ababa, ayaa la filayaa markuu soo dhammaysto socdaalkiisa caafimaad ee Jarmalka u sii dhaafi doonaa dalal kala duwan oo Yurub ah, isla markaana kulamo kula yeelan doono masuuliyiin kala duwan iyo qurba-joogga reer Somalilad.


Md. Axmed Yuusuf Yaasiin ayaa ka hor intaanu u xadhko-xidhan safarkiisa waxa uu kormeero kala duwan ku sameeyay xarumaha hay’adaha dawladda, isagoo kulamo la yeeshay masuuliyiinta kala duwan ee hay’adaha uu booqday, waxaannu ku boorriyey dardargelinta hawlaha qaranka sannadka cusub 2010-ka oo uu sheegay xukuumaddiisu culayska ugu weyn saari doonto adkaynta nabadgelyada iyo xasilloonida guud ee dalka.




Jamhuuriya

Taageerayaasha KULMIYE ee Burco oo isu soo Bax Ballaadhan ku Ayiday Mowqifka Hoggaanka Xisbigoodu ka 20090305

Taageerayaasha KULMIYE ee Burco oo isu soo Bax Ballaadhan ku Ayiday Mowqifka Hoggaanka Xisbigoodu ka
Published: Mar 05 2009 - 07 38
Mar 05 2009 (Somaliland Net) - Burco - Taageerayaasha xisbiga mucaaradka KULMIYE ee Gobolka Togdheer, ayaa shalay isugu soo baxay bannaanbax ballaadhan oo ay ku taageerayeen mowqifka hoggaanka xisbigoodu iska taagay muddaynta cusub ee doorashada Madaxtooyada Somaliland iyo dhammaadka muddo-xileedka Madaxweynaha.
Bannaanbaxa lagu taageeray mowqifka KULMIYE ee dib-u-dhaca doorashada oo lagu qabtay barxada xafiiskooda magaalada Burco, ayaa waxa ka qaybgalay boqollaal ka mid ah taageerayaasha xisbiga ee ku dhaqan Gobolka Togdheer.

Dr. Cabdi Aw-Daahir Cali oo ka tirsan guddiga fulinta ee KULMIYE, ayaa hadal dheer oo uu halkaa ka jeediyey, waxa uu ku sheegay in taageerayaasha xisbigooda ee Gobolka Togdheer ay si weyn u taageersan yihiin mowqifka KULMIYE iska taagay muddo-kordhinta xukuumadda ee xilligan.

“Waxa la yidhi, doorashadu waxa la qabanayaa 31 May, wakhtigiina waxa uu ku egyahay 6 April, markaa wixii wakhtigaa ka dambeeyaa waxay ka dhigan tahay baylood la yidhi diyaarad kaxee oo Sucuudiga gee oo shidaalkana loogu talogalay halkaa oo markuu Yemen marayey yidhi, London ayaan tegayaa, shidaalna ku shubi maayo oo soo qarxi mayso, sidaa daraadeed mowqifka xisbiga KULMIYE-na waa kaa Hargeysa ka soo baxay oo aynu taageersanahay.”

Waxa kale oo Dr. Cabdi Aw Daahir xusay haddii ay ku guulaystaan doorashada in arrimaha wax ka qaban doonaan ay ugu horreyn doonto beddellaadda lacagaha giinbaarta ah ee laga isticmaalo gobollada Sool, Sanaag iyo Togdheer, isla markaana ganacsiga xoolaha ee kootada lagaga dhigayna ay ka qaadi doonaan oo ku beddeli doonaan ganacsi xor ah oo aan cidna u xidhnayn “Lacagta 2% ah ee loogu talagalay horumarinta gobollada Sool iyo Sanaag/barina noqo maayaan kuwo ku xerooda Madaxtooyada ee waxaanu wax ugu qaban doonaa dadkii loogu talagalay.

Ciidammada Qaranka ee heeganka ugu jira ilaalinta waddanka ee aan qaadan mushahar ku filan ay siin doonaan mushahar ku filaada iyaga iyo reerahooda, waxaanuna dalka ka hirgelin doonaa bangiyo ganacsi oo madaxbannaan,” ayuu yidhi Dr. Cabdi Aw Daahir Cali.

Cabdilaahi Maxamed Cabdiraxmaan oo ah Guddoomiyaha Awal/bari, horena u ahaa Guddoomiyaha UDUB ee Togdheer oo dhowaan ku biiray KULMIYE, ayaa isaguna in ganacsigii xoolahu yahay mid kooto loogu xidhay ganacsade Sucuudi ah, isla markaana Berbera noqotay meel laga guuray, “Haddaad aragtaad magaaladii Berbera ee muddooyinka qaar u muuqan jirtay caasimadaha dunida hadda waa cidla’, kadib markii loo xawilay ee loo xidhay dekedda Jabuuti. KULMIYE nabadgelyada waxba uma dhimayo oo iyaga ayaa cid kasta ka jecel, haseyeeshee muhiimadda aynu maanta isugu soo baxay waxay tahay inaynu muujino sidaynu u taageersan nahay mowwqifka xisbigu iska taagay dib-u-dhigista doorashooyinka Madaxtooyada,” ayuu yidhi Awal-bari.

Isku soo baxan oo ahaa mid ay si weyn u soo abaabuleen musuuliyiinta KULMIYE ee Burco, ayaa ciidanka boolisku waxay xidheen muddo saacado ah Guddoomiyaha xisbiga ee Gobolka Togdheer Mr Sahal Maxamed, kuwaasoo ku hayay Saldhigga Dhexe ee Booliska Burco, balse la sii daayay markii dambe, tallaabadaas oo ay ku sababeeyeen in isu soo baxani yahay mid aan wax sharci ah looga soo qaadan masuuliyiinta gobolka iyo Booliska.

Mr.Sahal ayaa sheegay in aanay fasax cidna uga qaadanayn barxadda xafiiskooda hortiisa, laakiinse sharciga waxa loo samystay marka loo baahdo in khayriyada xisbiyadu ka hadlaan.

Mar la weydiiyey in maamulka weydiisteen wax oggolaansho ah oo ku saabsan isu soo baxa taageerayaasha KULMIYE, waxa uu ku jawaabay, “Xalay [habeen hore] fiidkii ayaanu ku wargelinay in aanu berri leenahay isku soo bax maamulka Gobolka, isla markaan waxaan ku idhi sidaa ula soco maadama oo aad tahay gudodomiyhii Gobolka, waanu naga aqbalay, balse xalay goor dambe ayuu ila soo hadlay maamulka gobolka waxaanu igu yidhi, markii aanu eegnay xeer-hoosaadka, runtii anigu ma garanayo xeer-hoosaad halkan yaal ee sida aan qabo waxa uu la hadlay wasiirka arimaha gudaha iyo madaxweyne Rayaale, waxaanu dib iigula soo noqday go’aan ah in aan berri la qaban Karin isku soo baxayaga, intaas ayaanuna isku af-dhaafanay oo saaka aniga oo jooga goobta la ii keenay boolis, kadibna laygu yidhi, waad xidhan tahay guddoomiye, dabadeedna saacado ayaan xidhnaa.”

“Waxaannu u adkaysan weynay cabashada ka soo yeedhaysa taageerayaasha xisbiga, iyaga oo telefoonno inta badan nagu dawakhiyey. Markaa waxaanu iidinku yeedhay in aanu halkan idiinku sheegno, sida aad ka waryhaysaan hoggaanka guud ee xisbiga go’aankii uu gaadhay ayeynu taageeraynaa. Marka koowaad waxaanu leenahay ma oggolin wax korodhsiimo ah, doorashadiina diyaar ayaanu u nahay ee ha la qabto,” ayuu yidhi Mr. Sahal.

Sidoo kale isu soo baxan ayaa waxa ka hadlay cuqaal iyo waxgarad, kuwaasoo dhamaantood tilmaamay inay si weyn u taageesan yihiin mowqifka xisbiga ee ku wajahan dib-u-dhigga doorashada

jumhuriya

Abti Cawiloow Halka Aad Iigu Yeedhaysaa Waa Meeshii Aan Shalay Iskaga Tagay, Iminkana Waxay Ku Darsatay Inay ” Darawal 20090212

Abti Cawiloow Halka Aad Iigu Yeedhaysaa Waa Meeshii Aan Shalay Iskaga Tagay, Iminkana Waxay Ku Darsatay Inay ” Darawal
February 12th, 2009

Cabdillaahi Xuseen Iimaan (Cabdillaahi-Darwal) oo ka mind ahaa Garabka is bedal doonka Xisbil-xaakimka UDUB, isla markaana ka tirsan Musharixiinntii qaadacay natiijada Shirweynihii labaad ee UDUB ku soo doortay mar labaad hogaankiisii hore, ayaa deedifeeyay hadal todobaadkan ka soo yeedhay Wasiirka Maaliyadda Xuseen Cali Ducaale (Cawil), kaasoo uu ku sheegaay in Cabdillaahi Darawal yahay Mujaahid soo dagaalamay oo Miisaan culus ku leh Xisbiga UDUB dhexdiisa oo aan laga maarmayn. Isaga oo sheegay in aanay ka maarmayn, isla markaana ay ka shaqayn doonaan sidii khilaafka jira loo dhamayn lahaaa.
Cabdillaahi Xuseen Iimaan (Darawal) oo xalay Wargeyska Saxansaxo kula soo xidhiidhay khadka Teleefanka isaga oo jooga Magaaladda Hargeysa, ayaa gaashaanka ku dhuftay hadaladaa ka soo yeedhay Wasiir Cawil, waxaanu sheegay in Cawil ka mid ahaa Raggii markii ka qaybgalka Xisbiga laga horjoogsaday aan ka hadal, waxaanu ku tilmaamay amaanta uu Cawil u soo jeediyay mid sasabasho ah oo uu uga dan leeyahay inuu ku kala fogeeyo isaga iyo taageerayaasha ka midaysan qaadacaadda Shirweynihii UDUB.
Darawal waxa uu u soo jeediyay Cawil in aanu wakhti iskaga lumin amaantiisa, isaga oo intaa ku daray in uu mar kastaba ku soconayo go’aankii is bedal doonka ahaa ee UDUB.
“Ammaantan iyo hadalkan wanaagsan ee Cawil uu ii soo dirayo, nin dhab uga qaadanaya oo ay aqoon daro ka hayso ma ihi, C/laahi Xuseen Iimaan Darawal oo ka mid ah garabka xisbiga UDUB ee ay ku bahoobeen Murashaxiintii, Xildhibaanadii iyo xunbo kale oo dhawaan ku dhawaaqay inay qabanayaan shir ay ugu yeedheen inuu noqon doono ka sharciga ah isla markaana eedefeeyay shirweynihii labaad ee xisbiga UDUB ee murashaxiinta loogu doortay Daahir Rayaale iyo Axmed Yuusuf Yaasiin ayaa isaga oo daba socda hadal uu isaga warbaahinta u soo mariyay Wasiirka Maaliyadu Cawil Cali Ducaale sheegay in aanu mawqifkiisa waxba ka badeli doonin isla markaana jawaab ka bixiyay dhawr qodob oo uu xanbaarsanaa hadalkaa hore ee Wasiirku.”
C/laahi Xuseen Darawal waxa uu hadalkiisa ku bilaabay “Waxa aan doonayaa in aan wax ka idhaahdo arrinta aniga igu saabsan ee uu Cawil sheegay ama ka hadlay, Horta Abtigay (Cawil), nimankii shirka afduubka iyo guul wadaynta waday ayuu ugu geesisanaa waxaanu noqday ka ee ugu indhaha adag.
Mar haddii uu noqday kii ugu horeeyay ee ka hadlay arrinkaa ee ammaana sidii ay wax u dhaceen, sababta uu u ujeedana cid waliba way iska garanaysaa oo waxa uu doonayaa in aniga (C/laahi Darawal) iyo saaxiibaday nala kala shakisiiyo.
Ammaantan iyo hadalkan wanaagsan ee uu ii soo dirayna, nin dhab uga qaadanaya oo ay aqoon daro ka hayso ma ihi, waxaanan leeyahay haddii ay dhab kaa tahay waxaas oo ammaan ah ee aad ii sheegaysaa ee aad waliba ii qirtay in aan ahaa UDUB oo waliba aan wax badan ka soo qabtay, ma waxa aad ilawsan tahay in aad shalayna ii lahayd markaad
doonaysay inaad shirka iga xanibto, xisbiga UDUB-ba maaha, isla markaana Odayaal muddo kar ah oo kuu yimid aad ku tidhi Kaadhadh baanu u geynay oo wuu diiday.
Arrinkaas oo ahaa mid aanay waxba ka jirin oo ahayd uun waanu u badheedhnay in aanu ka joojino. Ta kale meeshan aad leedahay waanu doonaynaa oo waanu u yeedhaynaa,
horta meeshu waa meeshii aan anigu shalay iskaga tagay, wixii aan kaga tagayna waxaabay ku sii dersatay in ay qadiyadii, qaranimadii iyo gooni isu taagii Somaliland ay mugdi geliso, Xisbigaan awal rajo ka qabayoo xisbigiina wuu iga dhintay, Markaa waxa aan leeyahay abti idinka oo mahadsan wakhtiga ha iska kay khasaarinina.
Mujaahid C/laahi Xuseen Iimaan Darawal oo daba socda hadal uu Wasiirka Maaliyadu ka jeediyay qado sharaf uu dhawaan hotel Crown ee magaalada Hargeysa ugu sameeyay qaar ka mid ah xubnaha qurba jooga ah ee ka qayb galay shirweynihii xisbiga UDUB, waxa uu yidhi “Arrimaha aad ka sheegaysay (Wasiirka Maaliyada) ee ahaa isaga iyo Cabdi Aw Daahir baan isu geeyay, oo horta shirtiii shirkii aasaaska ee xisbiga UDUB,
way jirtayoo aniga, Cali Maxamed Waran Cade iyo nin kale oo Wasiir ahaa oo Oomane la odhan jiray waanu ka cadhoonay, sababtuna waxa ay ahayd uun Dimuqraadiyad la’aan, laakiin Nin oday ah ayaa joogay Ilaahay ha u naxariistee Marxuum Maxamed Xaaji Ibraahim Cigaal, markiiba waanu heshiinay arrintiina waanu dhamaysanay.
Adiga iyo Cabdi Aw Daahir baan idin heshiisiiyayna waxa aan ka leeyahay , aniga (Darawal) iyo Cabdi Aw Daahir laba nin oo Ilmaadeer ah ayaanu nahay, xilligaasna waxa aanu ahayn wasiiro, wixii naga dhaxeeyay iyo khilaafkii xisbigana waxa dhameeyay Allaha u naxiistee Cigaal”
C/laahi Xuuseen Iimaan Darawal isaga oo hadalkiisa sii wata waxa uu yidhi “Shirkaas horeba yeedhis baan kaga tagay, laakiin Allaha u naxariistee Marxuum Maxamed Xaaji Ibraahim Cigaal wuxuu igu qanciyay in wuxu uu yahay bilaw, waanu naga raali geliyay in ay khalad ahayd, saddexdayada Wasiirba sidaas ayaanu ku aqbalnay, laakiin tani mid badheedh ah oo la isu awood sheegtay oo intaas in leeg oo awood ah la isula hadhin
weeyaan, mana dhici karto waxa aan doono ayaan kugu samaynayaa hadana waan kuu yeedhayaa, markaa taasi waa mid dhamaatay mana dhici karto haddii ay wakhti iska kay khasaariyaana iyaga ayaa khaldan. Hawshayadiina hadii ilaahay yidhaahdo sida ugu dhakhsaha badan ayay u dhamaanaysaa.”
Jawaabta Cabdilaahi darawal ayaa waxa ay daba socotaa hadal uu wasiirka maaliyadu Cail Cali Xuseen maalin ka hor saxaafada u mariyay isaga , hadalka wasiirka waxa ka mid ah oo uu yidhi: “Waxaan anigu xasuustaa anigoo aan weli UDUB gelin markii isbiga la aasaasay bil iyo badh kadib ayaan dalka imi, laba nin oo aan aad u jecelahay ayaa la ii sheegay in xisbigii ka cadhoodeen markii doorashadii xoghayaha guud uu ku guulaystay ninka la yidhaahdo Dr.Cabdi Aw Daahir, laba nin oo aan aad u qiimeeyo mid abtigay buu ahaa Cabdillaahi Darawal, gaar ayaanan ula hadlay oo waxaan ku idhi, abti xisbiga dhexdiisa ayaad wax ku noqon kartaa nin xisbigii ka falaagoobay wuxuu noqdaa nin xisbigii ka fogaaday.”
Waxaanu intaa ku daray oo uu yidhi, “Wuu iga aqbalay isaga iyo Cabdi Aw Daahir-na gacanta ayaan isku saaray oo aan heshiisiyay, waxaan ku idhi laba qof oo culus baad tihiine xisbigiina ahaada, Cali wuu iga aqbalay, ninka innaga fogaada waa in aynu soo celino, Cabdillaahi-na waa ninkaas soo halgamay ee taariikhda ku leh dalka, xisbigana markuu ku jiro waxtar buu u yahay. Markaa Darawal waa nin culus oo soo halgamay ee waa in ninka cadhooda aan soo celinaa xisbi ahaan, Cali-na waa kaas maanta madaarkii Hargeysa inoo hagaajiyey, ciddii innaga cadhoota waanu soo ceshanaynaa,”
Xigasho: Wargeyska Saxansaxo

DR. CABDI AW DAHIR OO WARAYSI DHEER KA BIXIYEY SHIRWEYNIHII UDUB 20090207

DR. CABDI AW DAHIR OO WARAYSI DHEER KA BIXIYEY SHIRWEYNIHII UDUB

Xogahayaha arrimaha bulshada ee xisbiga mucaaradka ah ee KULMIYE Dr. Cabdi Aw Daahir, ayaa weji gabax iyo quus ka muujiyay aggaasinka iyo qaabkii uu u dhacay shirweynihii 2aad ee xisbiga UDUB dhowaan ku qabsaday magaalada Hargeysa.

Dr. Cabdi Aw Daahir oo xalay khadka Telefoonka ugu waramayey Wargeysa Yool, isagoo jooga magaalada Burco ee xarrunta gobolka Togdheer, waxa uu sheegay inb aan wali dunida lagu arag, lana maqal madaxweyne isagu soo xula xubnaha Golaha Dhexe, taasina ay marag-madoon u tahay heerka ay gaadhsiisan tahay aqoonta iyo kartida masuuliyiinta xisbiga iyo xukuumadda.
Sidoo kale, Dr. Cabdi Aw Daahir waxa uu waraysigaa kaga hadlay Xogahayaha guud ee dhowaan xisbiga UDUB loo doortay, waxaanu tafsiil ku sameeyay nuxurka qudbaddii uu madaxweyne Rayaale ka jeediyay madashii uu ka socday shirweynaha 2-aad ee xisbiga UDUB iyo arrimo kale oo ay ka mid yihiin khilaafka soo dhexgalay qaar ka mid ah masuuliyiinta xisbiga UDUB iyo miisaanka siyaasadeed ee ay xisbiga ku dhex lahaayeen Md. Cabdillaahi Darawal iyo xubno kale oo loo diiday inay shirka ka qaybgalaan.
Waraysigaas oo faahfaasan waxa uu u dhacay sedan:
S. Dr. Cabdi Aw Daahir waxaad ka mid ahayd aasaasayaashii xisbiga UDUB, sida aad la socoto waxa dhawaan la soo gebagebeeyay shirweynihii 2-aad ee xisbiga, kaasoo mar labaad dib loogu doortay Madaxweyne Rayaale iyo ku-xigeenkiisa in ay noqdaan musharixiinta xisbiga uga qayb geli doonta tartanka doorashada Madaxtooyada, marka haddii aad isku soo wada duubto qaabkii abaabulka iyo sidii uu ku dhamaaday shirku bal warbixin guud naga sii?
J. Waxaan u malaynayaa inaad u jeedo inaan muuqaal guud ama isbarbar dhig ku sameeyo shirweynihii 1aad ee xisbiga UDUB lagu aasaasay oo aan goob jog ka ahaa xogogaalna u aha.
Runtii waa laba marxaladood oo aan la isbarbar dhigi Karin, haddii aynu eegno shirkii kowaad 1aad ee xisbiga lagu aasaasay, waxa uu socday marka la isku daro qabanqaabadii iyo qabsoomidiisii 3 ilaa 4 bilood, waxaana ay ahayd ujeeddada laga lahaa mid balaadhan oo wax qabad leh, xeerar iyo shuruuc leh.
Hase-yeeshe shirkan imika dhacay, waxa uu ahaa mid muraad kaliya laga lahaa oo ahaa sidii Madaxweyne Rayaale iyo ku-xigeenkiisu u noqon lahaayeen musharixiinta xisbiga tartanka doorashada Madaxtooyada uga qayb gala. Waa sax oo taa laftigeedu ma xuma, balse waxay uga dhacday si qaab xun, waxaanay muujisay digteetarnimo aan nooceeda waligeed la arag.
S. Markaa Dr. Cabdi Aw Daahir ma waxaad ujeeddaa haba-yaraatee kama ay muuqan wax la taaban karo oo lagaga warwaro doorashada soo socota xisbiga UDUB?
J. Anagu Burco ayaanu joognaa, balse markii aanu talafeeshinada ka daawanay, wargeysyadana ka akhrisanay, waxa laga sii daayey wax qabadkii xusbiga.
Tusaale ahaan qudbaddii Madaxweynaha haddii aad dhagaysatay ama aad akhrisatay meel qudha kaga muu hadlin arrimaha aas-aasiga, sida dhaqaalaha, xoolaha, lacagta giimbaarta ah, tahriibayaasha, darajadii ciidanka, shaqa la,aanta iyo dhibaatada kor u kaca shidaalka, taasi waxay ina tusaysaa inaan Madaxweynuhu waxba kala socon arrimaha aas-aasiga ee bulshada, haddii aad daawato talfeeshinada dunida waxaad arkaysaa Obama Madaxweynaha Maraykanka oo habeen walba bulshada kala hadlaya arrimaha dhaqaalaha. Bal u fiirso dhawaan qiimaha shidaalku dunida oo dhan ayuu ka kacay, waxaanu gaadhay 145 dollar sax bay ahayd oo way jirtay, balse iminka wuu jabay oo qiimihiisi hoos buu u degay waxaanu gaadhay 35 Dollar, ma jirto cid qudha oo ka hadashay, madaxweynuhuna kamuu hadal.
Haddaba, waxyaabahaas oo dhan waxay muujinyaan sida ay hadda tahay xaaladda xisbiga UDUB. Sidoo kale arrintii ictirtaafka ma jirto cid ka hadashay, marka laga reebo safaro meelo lagu tegtegay.
S. Haddaba, marka aad sidaa u aragto xaaladda xumuumadda iyo xisbiga UDUB ma waxay kula tahay inaanay u bannaanayn fursad marlabaad dib loogu doorto?
J. Waallaahi qaddarka Ilaahay waa meeshiisa, balse waxaan xasuustay maqal aan joornaal ka akhriyey oo sifaynayey degtaytarku marka uu heer gaadho, waxa uu yidhi ma eego dadka, xataa hadday ay daaqadaha u soo joogsadaan, haddiise aan ka waramo dareenka dadka ku dhaqan gobolka Togdheer waa isbeddel-doon.
S. Cabdi Aw Daahir, haddii sidaa aad sheegtay uu hadda yahay madaxweyne Rayaale maadaama aad in badan ka wada tirsanaydeen xukuumaddii marxuum Cigaal, markii dambena habayaraato muddaduye ka wada shaqayseen xisbiga UDUB maxaad odhan kartaa baa iska beddelay shakhsiyaddiisii ama ku soo siyaaday?
J. Shakhsiyaddiisa waa gef oo waxba kama sheegi karo, waxayna igu noqonaysa haddii aan ka hadlo shakhsiyaddiisa shakhsi weerar, balse waxaan wax ka sheegi karaa wax qabadkiisa oo aan dhaliili karaa ama ku amaani karaa. Annaguse markii horena isna Madaxweyne-ku-xigeen ayuu ahaa ana wasiir ayaan ahaa, shaqana nagamay dhaxayn, markii dambena ana xisbigaan joogay isna xukuumadda ayuu madax ka noqday, waqtigaana waan ka madaxbannaanaa, hasayeeshee qofnimadiisa maan diidin shaqadiisa ayaanu isdiidnay.
S. Sidee baad Cabdi Aw Daahir u aragtaa xubanaha ay ka mid yihiin Cabdillaahi Darawal, Ismaaciil-yare, Xil. Duur iyo Xil. Axmed Sandoon saluugga ay ka tirsadeen shirweynaha 2aad ee xisbiga UDUB.
J. Horta raggaas waxa aasaasayaashii kaga jira Cabdillaahi Darawal, xubnaha kalena waa rag in muddo ah ku jiray xisbiga waqtigii ay ku soo biireen ba. Xisbi kastana dhexdiisa muran wuu ka jiraa, laakiin weli may dhicin xisbiyada mucaaradka ah inay u diidaan kaadhadhkii shirka lagaga qaybgalayey xubno aasaasayaashii xisbigu ku jiraan, waxayse taasi ka dhacday UDUB.
S. Dr. Cabdi Aw Daahir, marka arrimahaas aad soo sheegtay oo dhan laysu geeyo guul iyo guuldarro midkee bay u tahay xibiga KULMIYE?
J. Horta laba weji baa loo kala arkaya, mid waa qaab-xumaanta xukuumadda iyo xisbiga UDUB waana guul u soo hoyatay KULMIYE oo waxa kaga lumay taageerayaal badan. Tusaale ahaan markaad eegto 161-xubnood oo Golaha Dhexe ee xisbiga UDUB ah ka kooban yahay waxa soo magaacabayey madaxweynaha, weli lama maqal lamana arag madaxweyne yidhi anigaa golaha dhexe soo magacaabaya, taasina way caddahay oo taageeradii UDUB hoos ayey u ridaysa.
S. Ugu dambeyn, Dr. Cabdi Aw Daahir, waxaad ahayd Xoghayihii ugu horreeyey ee xisbga UDUB, dhowaana waxa la doortay Xoghaye cusub marka aad eegto xaaladda lagu jiro iyo baaxadda hawlaha looga baan yahay inuu qabto ma kula tahay inuu yahay nin ka soo bixi kara?
J. Wallaahi horta anigu aqoon shaqsiyadeed uma lihi Xoghayaha cusub, doorashadii waqtiga ka hadhayna waa muddo yar, balse markaad eegto waxqabadka kuwii ka horreeyay ee xisbiga iyo xukuumaddaba haystay way adag tahay waxa uu qaban karaa. Waxanse u soo jeedinayaa madaxweynaha iyo xukuumaddiisa inay ku dedaalaan sidii ay doorasho u dhici lahayd, intaa wixii ka horreeyayna ay u diyaar-garoobaan wixii dembi ay galeen in lagala xisaabtamo, haddii doorashada laga helana xilka si fiican u wareejiyaan

Gudoomiyaha Xisbiga Kulmiye Oo Socdaal Ku Soo Maray Deegaamo ka Ka Tirsan Gobolka Oodweyne 20081215

Gudoomiyaha Xisbiga Kulmiye Oo Socdaal Ku Soo Maray Deegaamo ka Ka Tirsan Gobolka Oodweyne
Oodewyne (Bederwanaag) December 15, 2008 - Gudoomiyaha Xisbiga Kulmiye Mdne Axmed Maxamed Maxamuud “Siilaanyo” iyo wefti balladhan uu hogaaminayo ayaa maanta social ku soo gaadhay deegaamo ka tirsan Gobolka Oodweyne ee ay hawlaha diiwaan-gelintu.

Weftigan Xxisbiga Kulmiye ee uu horkacayo Mdne Axmed Siilaanyo waxa socdaalkiisa ku weheliya Gudoomiye Ku-xigeenka Labaad ee Xisbiga Mdne Cabdiraxmaan Cabdiqaadir, Xildhibaan Axmed Cabdi Kijaandhe, Xildhibaan Siciid Cilmi Rooble, Dr.Cabdi Aw Daahir, Cabdilaahi Ismaaciil Bidhaan iyo Cali Tamaandho.


Weftigu markii ay gaadheen Oodweyne waxa halkaa ku soo dhoweeyay Xildhibaan Maxamed Xaaji Yuusuf “Waabeeyo“, Xildhibaan Jaamac Yuusuf Aadan oo labaduna ka tirsan Golaha Wakiilada iyo masuuliyiin ka tirsan Gobolka Oodweyne, Odayaal iyo Wax-gardadka deegaanka, Kormeerayaasha diiwaangelint iyo hawlwadeeno kale. Guoomiyiuhu intii uu socdaalka ku jiray waxa uu Mas'uuliyiin badan ka dhagaystay warbixino la xidhiidha hawlaha diiwaangelinta iyo sidii ay reer Oodweyne si mug leh ay uga qayb qaadan lahaayeen diiwaangelinta.


Weftiga waxa si aad ah u soo dhaweeyay dadweynaha ku dhaqan gobolka Oodweyne, gaar ahaana degmooyinka Oodwyne, Bali Cali Faarax, Gorayo-Xun, Boodhley, Xaaxi, Cadow Yuurura iyo tuulooyin kale ee ku gadaaman. Waftigu intii uu deegaanadaa booqanayay waxa uu u kuurgalay sida ay u socoto hawlaha diiwaangelintu iyo sugida nabadgelyada.


Kormeerka weftiga ka dib odayaasha deegaamadaasi ayaa faagaarayaal ugu waramay xaalada iyo duruuraha gobolka, kuwaas oo cabasho iyo dayro ka muujiyay wax-qabad la’aanta xukuumada maanta talada dalka haysa isla markaana dareenkooda ku muujiyay in loo baahan yahay in isbedel siyaasadeed ka dhaco dalka.


Weftiga oo caawa dib ugu soo laabtaqy magaalada Burco, ayaa sheegay in ay beri socdaalo ugu kicitimi doonaan deegaamo kale oo ku yaala gobolka Togdheer sida Xaaji Saalax,Waraabeeye,Bisiqa,Duruqsi,Bali Dhiig iyo meelo kale oo ka mid ah deegaamada ay hawsha diiwaan-gelintu ka scooto.

Bederwanaag News Online

Abdirizaaq Axmad Wacays

aahmed@bederwanaag.com

Guddoomiyaha Xisbiga KULMIYE iyo weftigiisii oo maanta socdaal ku maray Waraabeeye ilaa Balli-dhiig 20051215

Guddoomiyaha Xisbiga KULMIYE iyo weftigiisii oo maanta socdaal ku maray Waraabeeye ilaa Balli-dhiig
December 15th, 2008 Comments Off

Qorilugud (Somaliland.org) – Guddoomiyaha Xisbiga ugu weyn mucaaridka Somaliland, ee KULMIYE, Xaaji Axmed Maxamed Siilaanyo iyo wefti uu hoggaaminayo oo booqasho la xidhiidha kormeerka iyo dhiirrigelinta diiwaangelinta codbixiyayaasha ku jooga gobolka Togdheer, ayaa maanta kormeer ku maray deegaamo ay ka mid yihiin, Waraabeeye, Xaaji Saalax, Yucub-yabooh, Jaamac Qabar, Dhoqoshey, Dheryaley iyo Ballidhiig oo uu weftigu caawa u hoydey.

Guddoomiyaha, mudane Axmed Siilaanyo oo ay booqashadiisa ku weheliyaan, Guddoomiyekuxigeenka 2aad ee xisbiga, mudane Cabdiraxmaan Cabdulqaaddir Faarax, Muj. Maxamed Kaahin Axmed, Dr. Cabdi Aw Daahir Cali, Xildhibaanno ka tirsan Golaha Wakiillada oo ay ka mid yihiin, Xildhibaan Siciid Cilmi Rooble iyo Xildhibaan Axmed Cabdi Kijaandhe iyo xubno ka tirsan Golaha Dhexe ee xisbiga, waxa ay saaka subaxnimadii hore ka ambabaxeen magaalada Burco, iyada oo ay ahayd maalintii labaad ee ay kormeer ku marayaan deegaamada ka baxsan magaalada Burco, waxana uu weftigu maanta kormeerkiisa ku maray dhawr iyo labaatan goobood oo ay diiwaangelintu ka socoto, deegaamadaas ay kormeerka ku mareen.

Guddoomiyaha iyo weftigiisu waxay u kuurgelayeen sida diiwaangelintu uga socoto deegaamadaas, waxayna dadweynaha uga warramayeen muhiimadda diiwaangelintu u leedahay dalka iyo dadka Somaliland iyo weliba doorasho si xor iyo xalaal ah dalka uga dhacda.

Guddoomiyaha, mudane Axmed Siilaanyo, oo magaalada Burco gaadhey Sabtidii markii diiwaangelinta codbixiyayaashu ka bilaabantay gobolka Togdheer, waxa uu shalay soo kormeeray degmada Oodweyne, halkaas oo si weyn loogu soo dhoweeyey.

Weftiga guddoomiyuhu wuxuu caawa fiidkii gaadhey degmada Balli-dhiig, waxaana u qorshaysan berrito inay sii wataan socdaalkooda, isla markaana ay soo maraan deegaamada loo yaqaanno Balliweyn ee koonfurbari ka xiga magaalada Burco, kadibna ay ku soo hoydaan magaalada Burco.

Gobolka Togdheer, oo diiwaangelinta codbixiyayaashu ka socoto maalintii Saddexaad ayaa la sheegay in meelaha qaarkood ay weli cilado ka jiraan, isla markaana ay kala badan yihiin dadka iyo goobaha diiwaangelintu.

Sida uu ku soo warramayo weriye Liibaan Maaweel oo weftiga guddoomiyaha la socda, meelo badan oo ka mid ah deegaamada ay maanta kormeerka ku mareen ayaa waraaqaha lagu daabacayo ay ka sii go;ayeen, isla markaana ay hawlwadeennadu ka werwersan yihiin inay diiwaangelintu joogsato waraaqo la’aan darteed. Waxa kale oo uu sheegay in tuulada Dheryaley iyada maanta iyo shalay midna aanay diiwaangelintu ka socon, sababta oo ah matoorka dab-dhaliyaha ah oo ka xumaaday kooxda diiwaangelinta ee loo diray tuuladaas. Dadka ayaa safaf dhaadheer ku jira tuulooyinkaas oo dhan, waxaana taas sababay sida warku sheegay deegaamadaas oo xilligan barwaaqo ah, taasina ay dadka xoola-dhaqatada ah u saamaxdey inay fursad u haystaan inay isdiiwaangeliyaan.

Dhinaca kale, Koox wasiirro ah oo ay ka mid yihiin, Wasiirrada Duulista Hawada, mudane Cali Warancadde, Maaliyadda, Xuseen Cali Ducaale (Cawil), Hawlaha Guud, Siciid Sulub ayaa iyaguna maanta tegey degmada Oodweyne, waxaana la filayaa inay u socdaan olole siyaasadeed oo daba jooga socdaalkii shalay Guddoomiyaha Xisbiga KULMIYE iyo weftigiisu ku tageen Oodweyne.



C/risaaq M. Dubbad, Hargeysa.

(Dawladda Cusub ee xisbiga Kulmiye dhisi doono 20080811

(Dawladda Cusub ee xisbiga Kulmiye dhisi doono)
hadhwanaag 2008-08-11 (Hadhwanaagnews) Waxaa la filayaa in xisbiga Kulmiye uu bishan 23 keeda qaban doono kulankiisi la sugayay ee golaha dhexe oo lagu dooran doono musharaxiinta madaxwaynaha iyo madaxwayne ku xigeenka Kulmiye. Waxaa kaloo shirku ansaxin doona qaar ka mid ah dawladda cusub ee Kulmiye soo dhiso doono si codbixiyayaashu u arkaan tayada iyo qiimaha ay yeelan doonaanto dawladdii uu Kuomiye horkeeni doona dadlka marka ay ku guulaystaan xukunka dalka.

Kulmiye waa xisbiga kaliya ee Somaliland ee qabsaday shirwayne furan oo si dimuqraadi ahna ku soo doorraty gokaanka xisbiga, imika si dimoqraadi ah oo furan u dooranaya musharxintii magaca xisbigha doorashad madaxtooyada ku gali lahayd. Waxaa kaliya ee u hadhay Kulmiye waa inuu dadwaynaha u soo bandhigo qaar ka mid ah ragga hoggaamin doona dawladda uu Kulmiye soo dhiso doon haddii uu ku guulaysto talada dalka.

Hiorta waxaa ilaahay xisbiga Kulmiye ku manaystay waxgaradkii iyo aqoonyahanadii ummadd reer Soomaliland lahayd min bariga ugu shisheeya ilaa cidhifka ugu galbeedeeya. Marka xisbiga kuma yara rag buuxin kara jagooyinkan. Laakiin waxaa loo baahan yahay aqoonyahanno dhisi kara jiil siyaasiin ah oo si hufan oo wadajir ah u wadashaqayn kara, dalka iyo dadkana ka saari kara marxaladaha adag ee hadda horyaalla iyo kuwa mustaqbalkba soo food saari karaba.

Iyadoo arrintaasi laga duulayo, waxaan jecelahay inaan halkan ku soo bandhigo qaar ka mid ah ragga magaca wayn ku leh dalka, aqoon iyo waayoaragnimana u leh sida loo hago hawlaha siyaasadda iyo dawlaldnimada ee xisbiga Kulmye badka soo digi karo kana codansan karo inay ummadda u adeegaan. Waxaana ka mid ah raggaasi Maxamed Cumar Xashi, Abdiraxman Yusuf Cartan, , Dr Maxamed Cabdillahi Cumar, Dr Cabdisalaam Yasiin, Dr. Cabdi Aw Dahir, Da’ud Khayre, Ali Guuleed “Cali Marshal”, Ismaciil Aare, Cabdicasiis Samaale iyo Axmed Cabdi Kijaandhe.

Kooxdani waa koox miisaan wayn oo siiyasadeed xisbiga ku leh, dalkana qadarin iyo magac fiican ku leh. Waana niman aqoonyahanno ah oo dalka iyo debaddaba caan ka ah. Xubin kasta oo ka tirsan kooxdani wuxuu si kalsooni leh u gudan kara waajibaadka looga baahan yahay hogaaminta dalka. Waana garabka aqoonyahanada ee hogaamiya siyaasadda xisbiga ee sare. Waxaana la rumaysan yahay inuu guddoomiyaha cusub ee xisbiga Kulmiye kooxdan ka soo bixo doono.Waxaa kaloo dad badan oo kale ay aaminsan yihiin in kooxdan uu ka soo bixi doono hogaamiyaha mustaqbalka ee dalku.

Waxaa la rajaynyaa dawladda ay ku jiraan kooxdani ay noqon oonto mid dalka u horseeda hurumar dhaqaale, mid siyaaadeed iyo mid bulshoba.

Cabdicasiis C Xirsi
abdicazizomar@yahoo.com

lafaagurka Shirweynahii Golaha Dhexe ee Kulmiye 20080831

lafaagurka Shirweynahii Golaha Dhexe ee Kulmiye
August 31st, 2008 Comments Off

Lafagurka Shirweynahii Golaha Dhexe ee Kulmiye (qaab Nooceeya ayey Doorashadu u Dhacday)
Qore Abdiaziz Ahmed Mousa
Abdiaziz2@mail.com

25 August 2008 waa Maalintii u danbeysay ee shirka loogu tala-galay in uu dhamaado.waxa soo buuxiyay Madasha shirku ka dhacayey ee Hotel City Plus Ergooyinka shirka , Dibada hoolka shirka waxa ka socoday dood qaylo wadata oo la isku oorinayo ama la iskugu hanjabayo inaan shirku furmin,

waqtigii shirku in uu furmo loogu talo-galay oo ahayd 8:30 PM ayaa dib looga yara dhacay si loo sugo Ergooyinka Shirka iyadoo la ogaa in habeenimadkii aan la seexan, kooxada taageersan musharax Cabdirahman aw cali farax iyo cadami ayaa ku tiraabaya hadalo ka dhan ah Hogaamiyaha kulmiye Ahmed Mohamed Siilaanyo , waxaana hadaladaasi ka mid ahaa(Waanu garanaynay kolkii uu xaafadiisa nala tagay in uu waxan maagan yahay) Mid kale ayaa ku tiraabayey (19 84 tii uu waday ayuu wadaa ) iyo kuwa la mida,

waxa ay kooxda mucaridka ku ahayd saylici ay mar kaliya yidhaahdeen markii shirgudoonku sameecada ka sheegay shirku waa furmay ee ha la soo galo, ina keena hayaay gali mayno Hotel cigaal ayuu ka dhacayaa Shirkeenu ee ina keena dhamaantood iyagoo cadhaysan ayey Gawaadhida kaxaysteen ,qaar ku hadhay goobta oo gawaadhidu ka tagtay ayaa ladqabo la is yidhi ku soo galiya goobta waa ay diideen, ragga ladqabada waday waxaan ka xasuustaa ,Xildhibaan Cali mareexan ,Maxamed Kaahin iyo dhowr nin oo kale,

Laakiin kooxdii cadhootay waxa ay isku daba wareegeen kolba hudheel , qaar waxa ay tageen Hotel Qulunbe ,qaar shamaxle hotel oo ku yaala dooxa burco ama biriijka hoostiisa, qaar barwaaqo hotel ..kooxdii tafaraaruq cadho ku jirto ayuu midba hotel tagay, waxa iyana hoolka shirka si toosa u buuxiyay taageerayaasha Saylici iyo hogaanka Xisbiga oo uu hogaaminayo Gudoomiyaha xisbiga ahna Musharaxa Madaxweyne ee xisbiga.Ahmed Mohamed Siilaanyo,

waxaan ku soo noqoday Hoolkii shirku ka bilaabmay ee City PLUS waxa la adkeeyay amniga waxa la i check-gareeyay laba jeer ..waxa madasha loo ogol-yahay oo kaliya ergooyinka xaqa u leh in ay codeyaan iyo saxaafdda xubnaha ka mida waxa la saaray goob-joogayaashii , waxa aan fadhiistay xaga danbe oo ay joogan dhowr suxufi oo dhalinyaro ah oo local ah,oo uu ku jiro wariyaha bbc-da burco xagar,

waxa aanu qiimeynay aniga iyo ragii meesha fadhiyay ee suxufiyiinta ahaa sida ay wax u dhacayaan waxa aanu aragnay in madasha ay fadhiyaan oo kaliya garabkii muxaafidka ahaa ee taageersanaa cabdirahman saylici musharaxa madaxweyne sida uu shirku u furmayna waxa aanu u argany mid ku dhisan cadho..goobtu waa ay ka duwan tahay sida ay ahayd maalimihii hore wa dagan tahay ergooyinku waa faraxsan yahiin waxayna doonayaan in ay xaqiijiyaan himaladooda,


GUDOOMIYAHA shirka jaamac shabeel ayaa ka codsaday ku xigeenkiisa iyo xoghayaha shirka cabdirizaq ciyaale in ay hubiyan magacayda ergooyinka fadhiya …waxa la yeedhiyay magacayadii waxaana ka muuqatay shir-gudaanka caajis iyo kala daadsanaan..waxayan u yeedhinayeen magacayda si aan taxadir lahayn ..waxa uu laba jeer ku hadlay shir gudoonku tiro is khilaafsan kol waxa uu yidhi madasha waxa fadhiya 149 xubnood wax ka yar 15 daqiiqana waxa uu yidhi dib ha loo tiriyo waxa ay noqotay 131 xubnood sidaasanu Kooramkii shirku ku qabsoomay ..cards-ka xubnaha golaha dhexe sitaan in kastoo intaan la soo galin la hubinayey oo ay gudida qabanqaabadu qaabilsanayd check-gareynteeda hadana marka gudaha la soo galo shirgudoonku muu hubinayn oo si caadiya ayey dadkuun u tirinayeen ama u yeedhinayeen.

waxaana u arkeynay in ay ka tahay aqoon darro xaga gudoominta shirarka noocan in ay haysato xubnaha gudoonka qaabilsan,kolna waxaan is idhaa malaha Shir-gudoonku kuma qanacsana doorashadda ee waxa ay la kala safan yahiin dhinacayada is haya Maadama caga Jiid ka muuqdo Dardarta ay u wadi lahaayeen hawsha ama cards-ka uga soo Ururin lahayeen xubnaha si ay u hubiyaan magacayada ay hayaan iyo kaadhadhka ay sitaan ergooyinku si meesha ay uga baxdo muran ama farsamooyin badani soo dhaaf taa , in yar ka dib waxa la galay xeer hoosaadka golaha dhexe waxaana cod la galiyay labada qodob ee lagu soo bisleeyay dibada Shalay (24 August 2008)ee ahaa Absolutely majesty iyo simple Majority, waxaana tiro dhan 129 lagu ansixiyay in Simply majority cod dheeri lagu doorto musharaxiinta Madaxweyne iyo ku xigeen ee xisbiga, sidaas ayaanu qodobkaasi ku meel maray,

waxa la galay ama la furay qodob ay soo jeediyeen ama lagu daray sida uu shir-gudoonku sheegay doorashaddii hogaanka xisbiga ee Hotel Ambassador ka Dhacday ,taas oo ahayd in dastuurka lagu daro qodob odhanaya ama loo codeeyo (haddii Gudoomiyaha xisbigu uu Musharax madaxweyne noqodo oo marka lagu dhawaaqo natiijadda madaxtooyadda ha helo ama ha waayee waxa automatic ama si toosa u noqonaya Gudoomiyaha Xisbiga GUDOOMIYE ku xigeenka xisbiga, ayaa la guda galay

hadba qodobkaasi ayaa shirgudoonku soo jeediyay in cod la galiyo oo la doorto ninka noqonaya gudoomiyaha xisbiga kolka lagu dhawaaqo natiijadda madaxtooyadda ama uu ku xigeenka koowaad uu si toosa u noqodo gudoomiyaha xisbiga,

hadba ragg dhowra ayaa istaagay oo yidhi aan ka hadalno oo ay ka mid ahaayeen cabdirahman cabdiqadir gudoomiye ku xigeenka labaad iyo cabdi aw daahir iyo mohamed kaahin,..laakiin shir-gudoonku waxa uu u ogolaaday in uu hadlo cabdi aw daahir oo soo jeediyay in laga doodo qodobkaasi oo aan sidiisa lagu gud-galin , hase ahaatee buuq yar ayaa dhacay oo uu shirgudoonku qaboojiyay waxaana cod la galiyay labada qodob,

Waxaana aqlabiyadd ku guulaystay xubnaha qabay in si automatic ah uu gudoomiye ku xigeenka koowaad u noqodo gudoomiyaha xisbiga kolka lagu dhawaaqo natiijadda madaxtooyadda, waxa dhoola cadeeyay ninka ay jagadaasi sugayso Muuse biixi waxaana diiday ragg badan oo ay saaxiib ahaayeen oo jeclaa in lagu tartamo jagadaasi oo ay ka mid ahaayeen cabdi aw daahir oo galbeeka burco ka soo jeeda iyo Maxamed Kaahin,

si kastaba ha ahaatee Doorashadda kulmiye ka dhexe dhacday waxa ay iskugu jirta noocyo badan ,Xubnaha meesha iskugu yimid nin waliba masiirkiisa ayuu ka talinayey waxayana Xubnahu iskugu jireen sadex nooc, 1-Nooc xisbiga u galay mabda siyaasiya oo ay kaga soo horjeeda Maamulka jira oo la safnaa cida awooda Xisbga haysa,2-nooc xisbiga ugu jira masiirkooga oo doonaya in ay helaan kuraasi haddii ay waayaana xisbiga la waayi doono ama ay ka diga rogataan si ay u helaan maal ay kursi ka soo fuulaan, 3-nooc xisbiga ugu jira xoogsi ama ka shaqeyso dhinacayda is haya oo kolba taageer afkaar aad dhaqaale ku heli karto halkii loo batana raac ama ku dhisan Raaciyadd Qabaliya, hadaba kooxaasi waxa ay ka midaysnayeen mid kaliya waa in uu noodo hogaamiyaha xisbigu Musharaxa Madaxweyne Ahmed Mohamed Siilaanyo ,

si kastaba ha ahaatee Doorashaddii Madaxweynaha kolkii la gaadhay ee Dastuurkii la ansixiyay ayuu shir-gudoonku ku dhawaaqay in nasasho shaahayn ah la galo 15 daqiiqo laakiin taas waxa ka soo horjeestay Ergooyinka Shirka oo miis-ka garaacay ,waxa aan isha la raacay dareenka Hogaanka xisbiga gaar ahaan musharax madaxweyne iyo ku xigeen ..waxa ka muuqatay inaanay raali ka ahayn dib u dhac shirka lagu sameeyo ,..waxaanu shir-gudoonku ku dhawaaqay in la guda-galo Doorashadda madaxweyne iyo ku xigeen madama ayna ergooyinku rabin in ay nastaan,

waxa aan u arkay in uu shir-gudoonku u baajinayey mudada 15 minute ah in la helo waanwaan oo la soo celiyo 63 xubnood oo golaha dhexe ahaa oo la sheegay in ay ahaayeen kooxda la cadhootay musharaxiinta madaxweyne ku xigeen kuwaas oo kala ahaa Cabdirahman aw cali farax iyo Ahmed xaaji cali cadami,laakiin taasi waxa aqbali waayey ergooyinka madasha fadhiyay oo Doortay inaan la isku joojin haddii kooramku buuxo,

waxa uu ku dhawaaqay gudoomiyaha shirku in loo codeeynayo Musharaxa madaxweyne iyadoon la eegin CV-giisa musharaxa madaxweyne Ahmed Mohamed Siilaanyo ayaa kacay si uu u tuso Ergooyinka wajigiisa waxa madasha fadhiyay 131 ergay oo kooramku ku furmay halka golaha dhex tiradiisu ahayd 192 waxaana u codeeya ahmed Siilaanyo in uu Musharax madaxweyne u noqodo 129 Ergay sidaas ayaanu ku ansaxay waxaana la guda galay Doorashadda Madaxweyne ku xigeenka oo muran ka taagnaa..waxa la yeedhiyay musharax koowaad Ismail muumin Aar, ninkaas ayaa kacay waxa uu sheegay in uu tanaasulay sababa badan awgeed oo uu xisbiga dantiisu ku jirto ,

waxa soo hadhay sadex musharax oo kala ah Cabdirahman Saylic ,Cadami iyo Cabdirahman aw cali, waxa goobta joogay cabdiraman cabdillahi cali saylici oo ahaa musharaxa madaxweyne ku xigeen .waxaana cod la galiyay cida u codaynaysa musharaxa jooga maadama ragii kale maqan yahiin..waxa gacanta taagay 123 ergay waxa diiday 8 ergay halkaas ayuu ku ansaxay Musharaxa Madaxweyne Ku xigeen saylici…wax danbana la isma waydiin oo ergooyinkii goobta fadhiyay waxa ka dhacay culays ay habeeno badan u soo jeedeen waxaanu shir-gudoonku ku dhawaaqay nasasho,

waxa la shaah tagay dibada gaar ahaan deyr ku wareegsan Hoolka oo albaabada laga soo xidhay si aanay ergooyinku u bixin kaas oo ka danbeeya dayrka laga soo galo hudheelka oo aan is idhi waa nooc u eeg qaabka military-ka hoolalkooga loo nashaqdeeyo , maadama Hoolka hudheelka ku dhex yaala lagu soo weegaaro deyr-kale taas oo aan lagu arakin hudheelada kale,waxaana nusa-saacihii ama shaahii loo soo galiyay gudaha ..waxa laga faalooday sida ay wax u dhaceen,

waxaan waydiiyay Maxamed kaahin in magaaladda burco ay ka dhacaday doorasho noocan ah ama olole noocan ah oo culays noocaas oo kale leh?

Kaahin waxa uu ku jawaabay may dhicin laakiin shirweynahii dib ula soo noqoshadda Madaxbanaanida Somaliland ayaa ugu weynaa shir ka dhacay halkan kaas oo aan doorasho la galin laakiin dib u heshiisiin ahaa kanaan ku xiga ,,

kaahin oo aan waydiiyay sida uu u arko ragga baxay ee miisaanka ku lahaa xisbiga ee ay saaxiibka ahaayeen waxa uu ku tiraabay isagoo dad badani hareeraha naga taagan yahiin ,

(XISBIGA Kulmiye lug ayaa qalashay waa naafoobay ..laakiin waxaanu u hawlgalaynaa inaanu soo celino ragga cadhooday),

Hogaamiyaha Xisbiga Kulmiye Doorashadda Ka dib Hadal uu jeediyay waxa uu u muuqday in uu la dhacsan yahay sida wax u dhaceen oo aanu wax weynba u arkayn raga baxay, anigoo is idhi go’aanka noocana waxa uu u qaatay Khibrada uu ka soo qaatay 40 sano Siyaasada uu ku jiray ee ka dhaca shirarka in lagu xaliyo marar farsamooyin badan oo ay tani ku jirto,

waxa cadho kale sii abuuray ka dib markii gudoomiye ku xigeenka koowaad ee xisbigu Muuse Biixi Madasha kaga dhawaaqay in la Ansixiyo xubnaha wasiiradda noqonay mustaqbalka ee golaha fulinta loo yaqaano oo 35 ka koobnaa oo 6 ahaayeen hogaanka xisbiga inta kalana ahaayeen Ergooyin la soo xuley oo titles loo sameyay kuwaas oo dhamaa 29 xubnood iyo 6 la taliye ,

sida lagu saleeyay ayaa ahayd in xubnaha xilka haya aan la dooran sida xildhibaan iyo wixii la mida, waxaana liiska golaha fulinta iska dhexwaayey xubno badan oo ay ka mid ahaayeen ragii hagayey shirka ama shirgudoonka halka ay ka buuxeen xubnaha qabanqaabada shirka oo ay ka mid ahaayeen abdikariim xinif,Xuseen ahmed Caydiid ,Ahmed Xaashi ODEY ,iyo ragg kale,

la Soco Qaladaadka ay galeen Labada Dhinaca ee isku hayey Nidaamka loo guda galayo doorashadda iyo habka macaanayd ee lagu xalin kari lahaa Dimuqraadiayadda Xisbiga Dhexdiisa ama ay ka baran karaan ASXAabta kale in anay ku dhicin tanoo kale???